7-10 июльышто Екатеринбургышто «Иннопром-2025» тӱнямбал промышленный ончер эртаралтеш. Тушто Марий Эл Республикын делегацийжат пашам ышта.
Мемнан представитель-влак регион-влак кокласе вашкыл шотышто Россий-Китай форумышко ушнат, «Индустрия детских товаров 2.0: возможности регионов» секцийыште, Российысе Промышленность ден торговльо министерствын иктешлымашан коллегийыштыже да моло вереат лийыт.
Марий кундемын стендыштыже 10 вӱдышӧ предприятий дене палдарыме. Нуно шке сатуштым Российыште, лишыл зарубежьеште ужалат да тиде сомылым кумдаҥдаш шонат.
«Иннопром-2025» ончер предприятий-шамычлан у партнёрым муаш, коллегышт дене опытым пайлаш, а республиклан промышленный потенциалым пеҥгыдемдаш полша.