Медведево посёлкышто илыше Тимофеевмыт марий ешыште Даяна лӱман ӱдыр кушкеш. Тудо ныл ияш. Даяна кушташ, почеламутым лудаш, йомакым каласкалаш йӧрата. Тыгай оҥай лӱмым пуымо нерген Алёна аваже ойла:
– Мӱшкыран улмем годым икмыняр лӱмым блокнотышкем возенам. Денис пелашемлан ты спискым ончыктенам. Тудо Даяна лӱмым ойырен. Такшым тыгай лӱмым пырля пашам ыштыше ик ӱдырамаш деч икымше гана колынам. Тудын ӱдыржӧ лачак Даяна улмаш. Тунам, иктаж-кунам ӱдырем лиеш гын, Даянам пуэм манын шонен пыштенам. Келшыше лӱм-влак спискыштемат Даяна икымше лийын.
Ӱдырна чылажымат шке семынже ышташ йӧрата. Мутлан, рисований кружокыш коштмыж годым, моло йоча-влак семынак туныктышын ойлымыжым колыштеш да кӱлеш семын сӱретлаш тӱҥалеш. Но вара садыгак шке семынже чиялта. Тыге мылам утларак келша, манеш.
Мутланаш вараш, кум ияш веле, тӱҥалын. Сандене дыр кызыт умшаже ок петырне. Иктаж-мом ыштен шинча да эре ала-мом мутлана. Шке семынже почеламутым але йомакым але эше иктаж-мом каласкала.
Усталык шӱлышан кушкеш. Йочасадыштыже «Дошколёнок», «Хореографий», «Англичан йылме» кружоклаш коштеш. Даяна – тыгак посёлкысо «Новые люди» театр-студийын участницыже. Мӧҥгыштат тӱрлӧ представлений гоч актёр койыш-шоктышыжым ончыкта. Тылеч посна кушташ йӧрата.
Даяна лӱмым иврит йылме гыч кусараш гын, «божественная» манмым ончыкта. Даяна – тюрк лӱм, маныт. Узбекистаныште, Киргизийыште, Азербайджаныште, Татарстаныште, Башкортостаныште тыгай лӱман ӱдыр-влак поснак шукын улыт. Тушто Даяна путешественнице, паломнице семын кусаралтеш.