Март мучаште «Мисс и мистер студенческих отрядов Республики Марий Эл» конкурс эртаралтын. МарГУ-со историй да филологий факультетын студенткыже Дарья Иванова тушто чылаштым ончылтен. Да конкурсын Нижний Новгород олаште эртаралтше Юл кундем федеральный округысо этапыштыже республикнан чапшым арален.
Туныктышо еш гыч
Дарья – Звенигово ола гыч. Чакмарий кыдалаш школыш коштын. Сайын тунемын веле огыл, тӱрлӧ мероприятийыш ушнен. Чолгалыкшым ончыктымылан да конкурслаште сеҥымыжлан «Артек» лагерьыш ик гана веле огыл канаш колтеныт.
Изиж годым Дарья туныктышо лияш шонен, да шонымашыже шукталтын, манаш лиеш, МарГУ-што филологлан кокымшо курсышто тунемеш. Ты корным тудо арам огыл ойырен налын. Дарьян аваже, кокаже руш йылмым да литературым туныктат, акаже – историйым туныктышо.
Икымше курс гычак
Университетыште икымше курсыштак Д.Иванова студент отряд толкыныш ушнен. А ынде ӱдырлан Российысе студенческий отряд-влакын Марий Элысе пӧлкажын PR-вуйлатышыже лияш ӱшаненыт. Дарья медиакумдыкышто Марий Элысе студотряд пӧлкан пашаж дене палдара. Тудо тыгак «Йода» педагогический студотрядын еҥже. Эше «Артек» йоча рӱдерыште – вожатый.
– Шукыж годым кугурак отряд-влак дене пашам ыштем. Йоча-шамыч дене кылым пеш вашке муын моштем. Тыште нимо нелыже уке – кечыште кажне икшывылан посна кеч ик минутым ойырыман. Тыге те туддене лишкырак лийыда, да йоча кеч-могай йодыш дене полышым йодын толаш ок ӧр. Кызытсе икшыве-шамыч моткоч чулым улыт, пеш вашке кушкыт. Нуным нимо дене от ӧрыктаре гай чучеш южгунам, но тиде тыге огыл. Чынжым гын, ӱдыр-рвезе-влакым куандараш шуко ок кӱл, – манеш Д.Иванова.
Чолга студентке
«Мисс и мистер студенческих отрядов Республики Марий Эл» конкурсышто усталык шӱлышым, уш-акылым тергыше этап-влак лийыныт. Студотряд дене кылдалтше ик темылан фото-влакым ямдылаш кӱлын. Тушто «Мисс» титулым налмыжлан Дарья моткоч куанен. Округысо этап 11 апрельыште Нижний Новгородышто лийын.
– Конешне, тургыжланенам. Но мероприятий ик шӱлыш дене эртен. Мыланем «Мисс Вдохновение» титулым пуэныт. А Марий Элысе этапыште сеҥыше Артемий Завалишин «Мистер студенческих отрядов Приволжского федерального округа» лӱмым сулен. Тудын верч моткоч куаненам, – ойла Дарья.
Чолга ӱдыр университетысе ятыр конкурсышто шкенжым терга: «Мисс МарГУ», студгородокын эртарыме «Лучший староста этажа» да молат. Тидыже стресс годым шкем чын кучен мошташ полша, койыш-шоктышым пеҥгыдемда, тыгак сцене деч лӱдмым чарнет да критикым приниматлаш тунемат манын палемда студентке.
Ончыкыжым Д.Иванова ойырен налме профессийже дене пашам ышташ шона. Российысе тӱрлӧ йоча лагерьыште: «Сириус», «Смена», «Океан» – пашам ыштен ончынеже.
Д.Иванован альбомжо гыч налме фото.