Ий гыч ийыш туныктымо аланысе профсоюз ушемыште илыш дене тӧр кайымаш раш шижалтеш. Районысо профсоюз ушем вуйлатыше В.С.Фёдоров у деч у вашталтышым пуртен шога. Морко районысо школлаште спорт шӱлышан пашаеҥ-влак коклаште тӱрлӧ таҥасымаш эртаралтеш. Шукерте огыл кыдалаш школ-шамыч коклаште волейбол дене таҥасымаш лийын гын, тӱҥ школ-влак дартсышке ушненыт.
Дартс – спорт модыш кокла гыч иктыже. Таҥасымашын участникше-влак пырдыжышке лӱмын келыштарыме тыртышыш (мишень маналтеш) чурик вуян дротик-влакым кышкат да очком погат. Дартс таҥасымашынат шке правилже уло. Тудо шинча пӱсылыкым, чон куатым йодеш. Дартс ӱчашымаште Кожлаер, Купсола, Шӱргыял да Эҥерсола школ-влак поснак ойыртемалтыныт.
Елена Григорьева, Морко районысо туныктымо аланысе профсоюз ушемысе президиумжын еҥже.
Снимкыште: Морко районышто дартс дене таҥасымаште сеҥыше-влак.