16 сентябрьыште «Ю» канал дене «Дом–2» черетан передачым ончыктеныт. Тиде серий «Слёзы мамы» маналтеш.
Тушто Марий кундем гыч актёр, каскадёр, марий рвезе Даниил Кораблёв DanKo псевдоним дене модеш. Тыгак Даниилын аважым, Надеждам, ӱжыныт. Нунылан ешыште авалийшаш ден эргыжлан марлан налшаш ӱдыр коклаште нелылыкым ончыкташ темленыт. Надеждан палемдымыж почеш, ешыште чыла сай, тидыжым модын гына ончыктыман улмаш.
Надежда Кораблёва тидын нерген тыгерак палдарыш:
– Мо оҥайже «Дом-2» телешоум ны мый, ны эргым ик ганат ончен огынал. Тудым ӱжыныт, кок арня шоненна, а шочмо кечыжлан кеҥежым унала мийымеке, сниматлалтме шӱлыш чонлан лишыл, сандене участнице лияш келшенам. Тусо коллективат сай, конкурс ден вашмутланымаш-влак келшат, а эн чотшо эргым дене пырля эртарыме жап чонемым куандара.
А шочмо кечыжым пайремлымашым, 23 июльысо шоум, интернетыште ончалаш темлена. Тушко Даниилым саламлаш Настя тукым шӱжарже пелашыж дене миеныт. Фотошто нуным чылаштым ужыда.