Сурткӧргысӧ чыла сомылым шуктен, изи ӱдырем дене уремыш лекташ шонышна. Молгунамсе семынак пӧрт воктенысе йоча площадкыште жапым эртаренна: ошма дене модынна, лӱҥгалтыш дене лӱҥгалтенна. Жап эртымеке, тораштак огыл верланыше кугу кевытыш миен толаш шонен пыштенна. Тушко йолын каенна.
Ошкылмына годым ваштарешна пӧръеҥ толын. Тудо шинчам шӱтен мемнан ӱмбаке ончен. А чакрак лишеммеке манын: «Плита ӱмбалнет чыве шӱр шолеш».
Ты жапыште ушым йомдарыме гае лийынам да чарнен шогалынам. Чынжымак, газым йӧрташ мондымем нерген шарналтенам да мӧҥгӧ велыш икшывем дене куржынна. А ты пӧръеҥ троллейбусыш шинчын кудалын. Кӧ тудо лийын да шӱр шолмым кушеч пален, тачат шонен коштам.
Екатерина О.
Озаҥ ола.