ЧЫН МУЗЫКАНЧЕ!

гармончо

Марий Эл Республикысе Кугыжаныш премийлан темлалтеш

Музыкант Сергей Пчёлкин марий сем тӱняште пашам ятыр жап тыршен ышта. Кызыт тудо «Марий Эл» кугыжаныш куштышо ансамбльын оркестржым вуйлата. Пчёлкинын пашаче кумылжым 12 еҥан шочмо коллективше, ятыр тӱрлӧ ансамбль, мурызо-влакат сайын палат. Музык тӱняшке тудым ачаже Александр Павлович кумылаҥден. А эргыже кузе баяным устан шокта!? Сем-влакын тӱрлӧ вариацийыштым, импровизацийым кучылтеш. Тудын гай сӧралын баяным иктат шоктен ок мошто. Сергей Александрович – чын музыканче!

Ты кумылзак пӧръеҥ эре пашаште: иктаж концертыште семӱзгарым шокта але мероприятийлан фонограммым ямдылен пуа. И.С.Палантай лӱмеш тӱвыра да сымыктыш колледжыште тунеммыж годым 1997 ийыште Стерлитамак олаште эртаралтше баянист-влак конкурсышто II степенян лауреат лийын. Гармоньчо-влакын конкурслаштышт таҥасен. Награде-влак коклаште Марий Эл Республикын тӱвыра, печать да калык-влакын пашашт шотышто министерствыжын Почётан грамотшо да Марий Эл вуйлатыше тауштымашыже улыт.

Марий кундемын семже

Я.Эшпай лӱмеш Марий кугыжаныш филармоний Марий Эл Республикысе Палантай лӱмеш Кугыжаныш премийлан «Музыкальный да калык художественный творчестве» номинацийыште композитор да дирижёр С.А.Пчёлкинын «Сказания земли марийской» хореографический спектакльлан (2015) да «Марипарк» музыкально-хореографический спектакльлан (2018) музыкальный произведенийже-влакым темлен. Нине паша-шамычлан тудо ятыр семым возен, аранжировко ден фонограмме-влакым ыштен.

«2014 ийыште Йошкар-Олашке Россий искусствын сулло пашаеҥже Зуфар Толбеев толын ыле. Тудо Омскысо хорын тӱҥ балетмейстержылан пашам ышта. Тунам Марий филармонийын директоржо Иван Ильич Егоров «Сказания земли марийской» постановкышто музыкылан вуйын шогаш мыланем ӱшаныш, – ойла Сергей Александрович. – Режиссёр пашам «Марий Эл» ансамбльын художественный вуйлатышыже, Марий Эл тӱвыран сулло пашаеҥже Владимир Климов шуктыш. Толбеев ятыр материалым шымлен, пырля нуным шерын лектынна. Тудо тошто семлан келыштарен, музыкым возаш темлен. Тыге «Илыш пушеҥге» хореографический сӱретлан, рекрут мурылан, сарзе куштымашлан, Пошкырт марий-влакын такмакыштлан, пӧръеҥ-влакын «Мончаш каена» мыскара куштымашыштлан, «Ялысе модыш-влак» вокально-хореографический композицийлан семым возенам, аранжировкым ыштенам», – ойла С.Пчёлкин.

Ты хореографический спектакльыште марий калыкын илышыже, йӱлаже, шӱм-чон поянлыкше нерген ойлалтеш, кундемнан моторлыкшым, ойыртемжым почын пуымо. Чыла тидыже «Марий Эл» ансамбльын лирике шӱлышан, весела, а южгунамже мыскара куштымашлаштыже, музыкальный номерлаштыже да хореографический композицийлаштыже сайын коеш. Тышке Сергей Пчёлкинат шке надыржым пыштен. Сем гоч композитор да аранжировщик марий мландым, йӱлажым, шке тӱсшым, шӱм-чон поянлыкшым йӧраташ ӱжеш.

Темлыме кокымшо пашаже – «Марипарк» музыкально-хореографический спектакльлан возымо музыкальный произведений-влак. Туштат Пчёлкинлан ятыр номерым возаш логалын.

Шотлен от пытаре…

С.А.Пчёлкин ятыр спектакльлан, посна коллектив ден мурызылан семым возен пуэн, аранжировкым ыштен, фонограммым ямдылен. Чылажым шотлен от пытаре, а шотлаш тӱҥалат гын, йомат.

М.Шкетан лӱмеш Марий драме театрыште шындыме икмыняр постановко нерген каласыман. Икмыняр ий ончыч М.С.Щепкин лӱмеш Кӱшыл театральный училищым тунем пытарыше марий студент-влакын «Русский секрет» диплом спектакльыштлан чумыр аранжировкым, фонограммым Сергей Александрович ыштен. Тылеч посна «Сӧсна поминка», «Шанель Тарля», «Ойырледа? Огына ойырло!», «Нӧнчык Патыр», «Зимняя новогодняя сказка», «Уло яллан ик Йогор» постановко-влакым ямдылыме годым пашам ыштен.

«Чумыр спектакльлан тӱрлӧ музык кӱлеш. Мутлан, машина мӱгырымым ончыктышо музыкальный заставкым кычал муат да шындет. Иктаж мурылан у семым возаш кӱлеш лиеш. Тыгак ятыр мурылан аранжировкым, фонограммым ямдылет», – манеш С.Пчёлкин.

А эстраде аланыште композитор лӱмлӧ да тӱҥалше мурызо-шамычлан шотлен пытарыдыме пашам ыштен. Раисия Даниловалан, Зоя Берниковалан, Анна Османовалан ятыр мурым ямдылен пуэн. Марина Садован эстраде корныш тошкалме жапыштыже возалтше ното-влакат Сергей Пчёлкинын вуйушыштыжо шочыныт. Сергей Пчёлкин Оршанке районысо Кугунур школысо «Шонанпыл» фолькор ансамбльланат шуко полшен. Вадим Красновын мурымо «Люда» мурылан семым возен, Вильсур Хамеевын – «Айдеме», Снежана Орлован – «Йӧратем мый тыйым пелашем» мурыштлан.

Сергей Александрович вуйым ок шупш: кушко ӱжыт, мия, выступатла, семым але фонограммым возашат кумылан. Шке пашажым йӧратыше еҥ. Ондак чумыр пашам уста композитор-аранжировщик изи пӧлеман пачерыштыже шуктен. Кызыт тудо шке студийжым шукерте огыл илаш пурымо у пачерысе балконышто шотештарен. «Тидыже ик могырым сай, но мыланем уда могыржат улмыла чучеш. Вет шыгыр пачерыште ондак чыла шуктымо пашажым ужынам, колынам да паленам, а пытартыш жапыште кӧлан мом воза, палыдеат кодын кертам», – манеш Аида пелашыже.

Кодшо ийын С.Пчёлкинын вуйлатыме оркестр «Музыка без границ» шоу-программым ямдылен. Тений тудым уэмден ончыктышт. Сӧрал! Тыште семӱзгарым шоктышо еҥ-влакын уста профессионал, виртуоз улмышт сайынак коеш.

…Мут толмашеш

2 ноябрьыште Сеҥымашын ХХХ идалыкше лӱмеш тӱвыра полатыште  «Марий Эл» ансамбльлан 80 ий теммылан пӧлеклалтше «В семье единой народов России» лӱман программе ончыкталтын. Кугу концертыште  «Марий Эл» кугыжаныш ансамбльын оркестржат выступатлен. У программылан С.А.Пчёлкин лу утла семым але аранжировкым ямдылен, тышеч индеш номерже ончыкталтеш. Тиде шкешотан сеҥымаш да мастарлык нерген ойла.

Эльвира Терентьева.