«Пеледше тукым» йоча усталык конкурсым Марий тӱвыра рӱдер кок ийлан ик гана эртара. Тений тудо Марий Элын 100 ияш лӱмгечыжлан да Сеҥымашлан 75 ий теммылан пӧлеклалтеш. Конкурсын ик номинацийже – «Национальный курчак». Тушко чылажге 70 паша пурен. Курчак-влак ойыртемалтше улыт, нуным ышташ тӱрлӧ материалым кучылтмо. Шӱртӧ, шинчалан руаш, кумыж, муно шӱм дене ыштыме марий ӱдыр, каче, сӱанвате, кова-влак моткоч оҥай улыт. Шуко пашаште сюжет коеш: теве сӱанвате-влак ӱдыр-каче воктен чӱчкен шогат, теве кова межым шӱдырен шинча. Кажне участник шке районжын вургем ойыртемжым ончыкташ тыршен.
