Россий Президент В.Путинын темлымыж почеш элыштына Калык фронт мер толкын икмыняр ий пашам шукта. Тудо кажне гаяк регионышто ышталтын. Толкын калык-влакын илышыштым куштылемдаш полшышо тӱрлӧ сомылым виктара.
Кызыт Калык фронт «Чыла сеҥымаш верч» проект почеш кугу пашам шукта. Ты кышкарыште боец-влаклан сарыште кучылташ йӧршӧ тӱрлӧ арверым, сатум да молымат погат да сӧйышкӧ колтат. Землякна-шамычлан полшаш кумылан-влак кажне кечын шукемыт. Ӱмаште, мутлан, поро кумылан еҥ-шамычлан кӧра Калык фронт СВО-ш 100 тонн гуманитарный полышым колтен.
Ты толкынын районласе пӧлкае еҥже-влакат лым лийде тыршат. Морко район «Чыла сеҥымаш верч» проектыш кодшо ийын ушнен.
(Фотошто: Октябрьский посёлкысо школ директор С.А.Иванов ден А.А.Титов)
Поро кумыл ушен
Тусо пӧлкан ик чолга еҥжылан А.А.Титов шотлалтеш. Поро пашаш ушнымышт нерген тыгерак палдарыш:
– Мемнан районышто илыше-шамыч ты суапле пашан кӱлешлыкшым умылат. Садлан нунын дене ты сомылым вораҥдарымаште нелылык огеш шижалт. Гуманитарный полышым погымо годым кажныже шке надыржым пышташ тырша. Салтак-шамычлан шокшо вургемым, кочкыш сатум да молымат эреак поген шогена.
Теве шукерте огыл «Передовик» ялозанлыкым вуйлатыше, Марий Эл Кугыжаныш Погынын депутатше Юрий Арсентьевич Игнатьев землякланна УАЗ автомашинам колтыш. Тудын дене пырля Кугу Шӱргӧ ял гыч Лидия Николаевна Ипатован кондымо мӱйжымат ужатышна.
Моркысо Юмын Кончымо черкын прихожанже-влак тӱрлӧ сату дене эреак полшен шогат. Пытартыш гана коло тӱжем утла теҥгелан эмым наледеныт. Кызыт личный гигиенылан арвер-шамычым погеныт. Тыгак меж носким ятыр пидын пуеныт. Тушко Арын черкын прихожанже-шамычат ушненыт. Нунын деч кумло наре мужыр носки пурен.
Районысо кажне ял шотан илем администрацийын вуйлатышыже, икте-кодде, шке лӱмышт дене салтак-шамычлан телымсе игечылан келшыше шокшо кемым налын колтеныт. Ик тыгай мужыр кем 2500 теҥгем шога.
Ончыкылыклан ӱшан уло
Палемдыман, районысо Калык фронтын пӧлкаже школышто тунемше-шамыч денат суапле пашам шукта. Тыге Юмын Кончымо черке пеленысе Рушарня школын воспитанникше да Морко посёлкысо 1-ше номеран школын тунемшыже-влак салтак-шамычлан У ий дене саламлымашан серышым возеныт. Ӱдыр-рвезе-влак нунылан сеҥымашым тыланеныт. Шукерте огыл Октябрьский посёлкысо школын тунемшыже-шамыч окопысо сортам ыштеныт да конден пуэныт. Ты пашаш Эҥерсола школын туныктышыжо да тунемшыже-шамычат ушненыт. Школлан сортам ышташ материалым Коркатово врачебный амбулаторийын пашаеҥже-влак налаш полшеныт.
– Шуктымо пашана дене кушкын толшо тукымлан тыл ден фронтын пырля пашам ыштымыштым ончыкташ тыршена. Вет илышыште тӱрлӧ пуламыр лектынак шога. Садлан самырык тукым кеч-могай ситуацийлан ямде лийшаш. Тӱҥжӧ – икоян, виян, полшаш ямде, калыкшым да элжым йӧратыше кушшаш. Тидыжым ме нунын чонышкышт да ушышкышт шыҥдарен сеҥена гын, ончыкылыкна ӱшанле кидыште лиеш манын, пеҥгыдын каласен кертына.
Сортам велыме, серышым возымо годым ӱдыр-рвезе-влакын чоныштышт садыгак могай-гынат шижмаш озалана. Тидыжым ме шке шинча дене ужына. Нуно салтак-влак, эл верч суапле пашам шуктат. Тидыжак моткоч шерге, – чонжым почо А.Титов.
(Нина Сергеевна Охотникова носким пидын пуэн)
Вургемым, эмым да молымат…
Морко кундемыште «Память» мер организаций уло. Тудо военный действийын да службын ветеранже-шамычын ушемыштлан шотлалтеш. Ты организацийын чулым еҥже-влак боец-землякна-шамычлан шкеак гуманитарный грузым шупшыктат. Вашке СВО кайыме верлашке уэш тарванат. Садлан районышто чарныде полышым погат. Землякна-влаклан вашке шокшо носки, окопысо сорта да моло сату миен шуэш.
– Боец-влаклан шокшо вургем, личный гигиене сату, эм кызыт эн кӱлешанлан шотлалтыт. Садлан нуным мыланна эреак конден шогат. Тидым нигӧм ӧкымлен огына ыштыкте. Еҥ-шамыч кузежым да моланжым чыла умылат. Садлан суапле пашашке ушнаш эреак кумылым ончыктат, – мане Анатолий Анатольевич.
СВО, чынжымак, икоян да поро еҥ-влакым иквереш чумырен. Кызыт кажныже сеҥымашым вуча да тидлан, уло вийжым пыштен, суапле пашам вораҥдара. Кӧ мо дене кертеш, тудын дене полшаш тырша. Тидыжак сеҥымашлан кугу ӱшаным шочыкта.
А.Титовын фархивше гыч налме фото-влак.