Вашлиймаш
15 апрельыште Юрий Зайцев Молодёжный политике комитетым вуйлатыше Станислав Игошин дене вашлийын.
Нуно молодёжный инфраструктур шотышто пашам иктешленыт да планым каҥашеныт. Ты сферым вияҥдаш Россий Президентын кӱштымыж почеш шукталтше «Регион для молодых» программе полша. Республикна ты проект конкурсышто кок гана сеҥышыш лектын. Проектым илышыш шыҥдараш кундемышкына 217 млн теҥге инвестицийым конден кертме.
2025 ийыште конкурсыш ушнаш Марий Элыште молодёжный политикым комплексно вияҥдыме программым ямдылыме. Тушто Кугу Отечественный сарыште сеҥымылан 80 ий темме лӱмеш «Авангард» рӱдерыште организаций ден ведомство-влаклан площадкым ыштат. Тидыже патриотизм шӱлышан мероприятийым эртараш, кызытсе молодёжьлан келшыше формат да йӧнан сомылым шукташ полшышаш.
Тыгак вашлиймаште Самырык-влак полатым олмыктен пытарыме нерген увертарыме. Уэмдыме деч вара тудо кызытсе жаплан келшыше шуко функциян рӱдерыш савырна.