14 августышто «Журавушка» социально-реабилитационный рӱдерыште приёмный ден опекун еш-влаклан «Встреча друзей» мероприятий эртаралтын. Тудо Еш идалыклан пӧлеклалтын.
Марий Элым Вуйлатыше Ю.Зайцевын кӱштымыж почеш мероприятийыш республикысе Правительстве Председательын алмаштышыже Михаил Васютин миен коштын.
Тыгай мероприятий шочмо ача-ава деч посна кушшо йоча-влаклан полшымо ден нуным вашталтыше еш-влакын статусыштым нӧлтымӧ шот дене эртаралтеш.
Вашлиймашын участникше-влак опыт дене пайлалтыныт, творческий номер-влакым ончыктеныт. Приёмный еш-влак психологический тренинг ден мастер-класслашке ушненыт. Подростко-шамыч профессий шотышто тестированийым эртеныт.
Тылеч вара Марий Эл Правительстве Председательын алмаштышыже Волжский районысо икмыняр школым ончен лектын.
Пӧтъял кыдалаш школым кызыт капитально олмыктат. Тушто шокшемдыше, вӱдым пуышо да канализаций системым олмыктымо, пырдыжым чиялтыме, спортзалыште у кӱварым ыштыме, пищеблокым уэмдыме. Пашам 95 процентлан шуктымо. Подрядчик ачалыме сомылым тунемме идалык тӱҥалтышлан ыштен шукта.
Волжск оласе 6-шо номеран школым аварийныйлан шотлымо, сандене йоча-влакым 12-шо номеран школыш кусарыме. Нунылан тушто 16 кабинетым пуымо. Тыгак тыште тӱҥалтыш школын спортзалжым, кокымшо пачашын фойежым ачалыме, окнам вашталтыме. 12-шо номеран школым уэмдаш республикысе бюджет гыч 6 млн утла теҥгем ойырымо.
М.Васютин тунемме верлам олмыктымо пашам терген, подрядный организацийын еҥже-влак дене мутланен. Тудо палемден: йоча-влаклан тунемме идалыкым сайын тӱҥалаш чыла пашам жапыште ыштен шуктыман. Тыгак Михаил Васютин Еш идалыкыште тӱҥ корно семын образованийыште инфраструктурым саемдымаш да качественный образованийым налаш условийым ыштымаш шотлалтыт манын.
Эльвира Терентьева.
Марий Эл Правительствын ВК-се лаштыкше гыч налме фото.