Оршанке район Кӧрдӧ ял ден райрӱдӧ коклаште улыжат 10 меҥге лиеш. Тиде ялыште кок урем уло. Иктыже, Мир манын лӱмдымыжӧ, ял покшелнысе пӱя дене пыта гынат, вес могырымжо умбакыже шуйна. А тудлан торешла уремым Лесной манме.
Кызыт Кӧрдӧ ялыште 36 суртышто 68 еҥ шотлалтеш. Еҥ-влак 25 пӧртыштӧ илат, 11 суртышко жапын-жапын толеден каят, кеҥежым эртарат. Йоча-влакат шукын огытыл, латнылытын веле.
Тысе вершӧр моткоч сылне. Садлан лачак Кӧрдӧ ялыште ятыр еҥ дачым чоҥа. Пу пӧрт шагалрак, шукыжым кермыч дене ыштыме.
Шемермыт деке
«Кокымшо урем мучаште Шемермыт илат» маньыч. «Шемер? Тыгай фамилий?» – йодам. «Уке, тиде – лӱм», – вашештыш ты ялыште илыше ӱдырамаш. А вара Шемер Богатырёв тидын шотышто тыгерак кугешнен вашештыш: «Мыйын лӱмем марий, теве Шкетанын эргыжат Шемер лийын, мыят Шемер улам. Тӱняштыжат коктын гына улына, очыни».
Шемер, ӱдырым налмеке, пелашыж дене Йошкар-Олаште илен. Кок эргышт шочын. Самырык ватыже 26 ияшыж годым черланен колен. Икмыняр жап гыч Шемер Фёдорович вес ӱдырамаш дене илаш тӱҥалын. Зоя Александровна вич да кок ияш шочшо-влаклан ава лийын.
Нылле кокымшо ий
Богатырёвмыт ынде нылле кокымшо ий пырля илат. Тений 1 октябрьыште Зоя Александровна 75 ийым темен, а Шемер Фёдорович 70 ияш лӱмгечыжым 4 августышто пайремлен.
НУНЫН нерген материалым «КУГАРНЯ» газетыште (2021 ий 12 ноябрь) лудаш темлена.