◊14 мартыште Кужэҥер район Йывансола тӱвыра пӧртын «Мурсескем» ансамбльже Кужэҥер посёлкышто эртаралтше Ӱярня пайремыш миен коштын. Тушто нуно мастарлыкыштым ончыктеныт.
«Мурсескемын» ончыкылыкшо верч тургыжланаш амал уке, вет тыште самырык еҥ шукемеш веле. Ты кечын калык ончыко эше ик у еҥ лектын. А кок самырык ӱдыр ынде шукертсек ансамбльыш коштеш, рвезе-влак гын тыштак кушкыныт манам гынат, йоҥылыш ом лий, шонем.
Еҥ-влак ансамбльын выступленийжым пеш шокшын вашлийыныт. Пытартыш «Сӱан куштымашыш» пырля тавалташат лектыныт.
Тек «Мурсескем» ансамбль умбакыжымат самырык еҥ-влакым вашлиеш да ӱшанле у тукымым кушта.
Наталья Петухова.
Кужэҥер район, Купсола.
