каласыш Звенигово район Красногорскийысе 1-ше №-ан школышто тунемше В.Сидоркина.
Виктория Сидоркина Сеҥымаш кечын кидыш барабаным налын да шке йолташыже-влак дене пырля ик йӱкпералтышым луктын ошкылын. Тидыже сылнын шокта да ӧрдыж гычат сӧралын коеш.
– Эн ончычак мый волонтёр улам: моло йоча-влак дене пырля школыштына театральный постановкым ямдылена, концерт ден митинглаште участвоватлена, линейкыште выступатлена. Тылеч посна кажне кеҥежым школ лагерьыште пашам ыштена, йоча-влаклан весела стартым эртарена, моло мероприятий годым полшена.
Кокымшо ий барабанщице улам, но Сеҥымаш парадыште тений икымше гана лийынам. Кодшо ийын 9 майыште Йошкар-Олашке коштынам, тушто мыланем «Мировая художественная культура» предмет дене всероссийский олимпиадын региональный этапыштыже медаль ден грамотым кучыктеныт ыле, – ойла тунемше.
Вика 9-ше классым йошкар аттестат дене тунем пытарен. «Визытанлан» гына тунеммыж нерген кажне ийын пуымо похвальный лист-влак пеҥгыдемдат. 2021 ден 2022 ийлаште ӱдыр тунемше ден туныктышо-влакын «Нам о России надо говорить» республикысе научно-практический конференцийыштышт англичан йылме дене икымше верым налын. Ты йот йылме дене олимпиадыште тудо районыштыжо эн ончылно лийын. Тыгак Виктория почеламутым сылнын лудмо конкурслаште сеҥен, тушто тӱрлӧ йылме дене каласкалымыж дене ойыртемалтын.
Яра жапыште В.Сидоркина книгам лудеш я кидпашам шукта, экзаменлан ямдылалтеш. Икмыняр ий «Лотос» эстраде куштымаш студийышке коштын. Пытартыш жапыште тунеммашлан шукырак жапым ойыра. Тудлан чыла предмет келша, но профессийым але ойырен налын огыл. «Эше ик тунемме ий ончылно, сандене тыгодым ончыкылык специальность нерген шонаш чот логалеш», – мане Вика.
Ӱдырын чолга улмыжым да сеҥымашлажым шотыш налын, эше 2016 ийыште Москосо Кремльыш ёлкыш колтеныт. Тидын нерген Виктория тыгерак каласыш: «Мый чыла сеҥымашем дене кугешнем, вет кугу пашам ыштымемлан кӧра тыгай лектышыш шуынам».
Чынак, школышто тыршыман, йогылан верым кодыман огыл – тыге гына ончыко каяш лиеш.