Медведево район Нурма кыдалаш школышто 175 йоча тунемеш. Эше шым ял: Салтак корем, Изи Мозар, Йылемучаш, Арбан, Нуръял, Тайлансола, Непот – гыч 70 наре ӱдыр-рвезым кок школ автобус шупшыкта. Тений школышто 11-ше классым куд еҥ тунем пытара.
– Школыштына «Точка роста» кок кабинетым кок ий ончыч почынна: химий ден биологий да физике. Тушто кызытсе жаплан келыштарыме оборудованийым вераҥдыме, тунемше-шамычлан экзаменлан ямдылалташышт ынде йӧнанрак. Физике кабинетыште «Робототехнике» кружокыш кудымшо классыште тунемше-влак коштыт.
Ончыч чыла гаяк выпускникна вузлаш тунемаш пурат ыле, кызытат тидын шотышто сӱрет куандарыше.
Тений краеведческий тоштерым почынна. Тушто Кугу Отечественный сарлан пӧлеклалтше посна верым келыштаренна. 2022 ийыште спортзалым капитально олмыктенна, тыгак душевой-влакым вераҥденна. Тений гыч спортзалыште футбол занятий-влакым эртараш тӱҥалынна, урок деч вара рвезе-шамыч мечым чумаш кумылын коштыт. А телым яндар южышто ече дене коштыт. Школыштына спорт мастер-влакын призышт верч ече таҥасымаш-влак кажне ийын эртаралтыт. Тушко моло район гычат тӱрлӧ ийготан-влак ушнат, – каласкала школ директор Л.Г.Бушкова.
Палемдыман, Лариса Геннадьевна тылеч ончыч 20 ий наре директорын алмаштышыже лийын, тыгак руш йылме ден литературым туныкта. Чылаже Нурма школышто 20 туныктышо пашам ышта. Нунын коклаште самырык-влакат улыт. Туныктышо-шамыч ӱдыр-рвезе-влакым олимпиадылан ямдылат, моло мероприятийлашкат кумылын ушнат. Сеҥымашыштат ятыр.
Лариса Геннадьевнан мутшо почеш, тунемше-влак кызыт весе улыт. Но нуным вурсыман огыл – вет илыш тыгай. Ӱдыр-рвезе-шамыч ончычсо семын вожылын огыт шого, нунылан чылажат оҥай. Тидым чын корно дене виктарен гына моштыман.
Авторын фотожо-влак.