21 мартыште Волжск оласе «Звёздный» да 27 мартыште Советский тӱвыра полатлаште ме, «Кугарня» газет редакцийын пашаеҥже-влак, «Воштылаш, товатат, сулык огыл!» конкурс-фестивальын отборочный туржым эртарышна.
Волжск олаште
Тышке Звенигово ден Волжский районласе мыскараче-влакым ӱжынна ыле. Саде кундемлаште мыскара шӱлышан еҥ-влак илат, шкештат тӱрлӧ оҥай номерым сценыште ончыкташ кумылан улыт.
Концертым Волжский район Корамас кундемысе «Чоткар тукым» ансамбль «Коллективем ом кудалте» муро дене почо. Ты коллективыш икмыняр вате коштеш. Нуно сценыш йыдалым чиен лектыч да яндар йӱкышт дене шергылтарен мурен пуышт. Варажым нине сӧрал вате-шамыч «Авамын эргыже» ден «Качым кычалына» сценке-влакым темлышт. Кокымшыжым «Морозко» руш калык йомак негызеш келыштарыме. Тудымак жюри ойырен нале.
Провой кундем Ӱлыл Памъял вате-влакат такмакышт дене сӧралын койыч. Тыгак ты кундем Поянсола гыч Валерий Платунов ден Игорь Петров «Роколма ден ковышта» мурым мурышт да «Кузе илет, Япык шольо?» сценкым модын ончыктышт. Кокымшыжо оҥай, но арака темым тарватыме. Икымше номерже дене нуным Йошкар-Олаште 1 апрельыште эртарышаш конкурсышко ӱжна.
Изи мастар-влакым, Волжский район Сотнур гыч изак-шоляк Никас ден Илья Игнашевмытым, залыште шинчыше-влак совым рӱж кырен вашлийыч. Ынде весела кумылан эрге-шамычым рӱдолаште вучена.
Пӱсӧ мыскарам ончыктышо-влак радамыште Волжский район гыч Ӱлыл Азъял гыч Р.Николаева ден Э.Кузьминан келыштарыме «Казаки» сценкышт ыле. Нуно эше «Дискотеке деч вара» сценкым ямдылен конденыт ыле. Ик артистке эн ончыч йолташ ӱдыржым модеш, а вара чыган ватыш савырна. Но тидлан ӱшанаш неле да мучашым оҥайын шонен шуктымо огыл…
Тылеч посна мыскара концертыште Звенигово вел Шолэҥер гыч Г.Степанова ден В.Фёдоров «Чон эре самырык» сценкыштым ончыктышт. Варажым нуно такмак-влакымат муралтышт.
Тиде районысо Красногорский гыч «Пиал» дуэтын участникше-влак Н.Зорина ден З.Иванова кок музыкальный номер дене ты касым сӧрастарышт.
Волжский район Пызырьгуб тӱвыра пӧрт пеленысе коллектив (вуйлатышыже – Г.Гурьянова) «Ялысе музыкант-влак» номер дене куандарышт. Иктын кидыште шершот ыле, весын – сава, кумшын – каструль петыртыш, нылымше, визымше да молынат – оҥай семӱзгар-влак. Шонен муыныт вет! Ты ансамбльыште кужу капан туныктышо Екатерина Кудрявцеважак мом шога?!
Советскийыште
Залышке калык шыҥ-шыҥ погынен ыле. Мыскараче-влакат толыныт да оҥай пашашт дене калыкым палдареныт.
Ты пайрем касым Советский район Голубой посёлко гыч «Кундыш сем» ансамбль весела такмак дене почо. Нуно эше мурымо номер да «Шӱм пелашым кычалмаш» сценкым темлышт. Коллективым вуйлатыше Людмила Орехова ден оҥай лӱман Индира Полевщикова кумылзак койышым ончыктен моштат, сценыште икымше гана огытыл, мыскараштым тачысе илышлан келыштареныт. Ончыкыжым эшеат сайрак номерым ямдылат манме ӱшан уло.
У Торъял район Тошто Торъял гыч Анатолий Никитинын ӱдырамаш образыште сайын ончалтмыжым палена, лач пӱсӧ мыскараже гына ыш сите. Такшым Тошто Торъял гыч мийыше «Ший оҥгыр» ансамбльын ӱдырамашыже-влак пӧръеҥым, пӧръеҥже-влак ӱдырамашым модаш йӧратат. Да тидыже удан огыл лектеш. Ик номержым жюри 1 апрельыште ончыкташ темлыш.
Медведево район гыч толшо Михаил Зуев (тудым Арбан Миша манына) шке илышыж гыч ятыр оҥайым каласкалыш. Нунышт икте-весе дене огыт кылдалт да южгунамже тидым воштылаш лиеш мо манын шоналтет…
Параньга район Усола гыч Светлана Ларионова ден Нина Григорьева мыскарам шке шонен лукташ мастар улыт. Ты гана нуно шоҥго ковайын доктор деке мийымыж нерген кок тӱрлӧ сценкым ончыктышт. Иктыжым рӱдолаште лийшаш конкурсышто ужына. Тыгак Светлана казам ужалыме нерген каласкалыш, тидлан лӱмынак сӧрал мурым возен.
Мыскара конкурсын вес уста участницыже-влак Римма Кудрявцева ден Елена Рыбаковат (Оршанке район Пуял) Йошкар-Олашке толыт. Нуно калык ончылно «Детектор лжи» сценкышт дене выступатлат. Мом ойлаш, шоям пален налаш полшышо аппарат таче модышто.
Муро конкурсыш Советский район Вечын посёлкышто илыше Людмила Дмитриевам ӱжна. Тудо нигунам колдымо такмак-влакым гармонь почеш муралтен тавалтыш.
Концертым сылне муро-влак дене клуб пашаен, самырык мурызо Диана Ямбаршева сӧрастарыш. Советский вел калыкын мыскара артист-влакым шокшын вашлийын моштымыжым шижна. Кумылым нӧлтышӧ кас кок шагат утла шуйныш.
Икманаш, нине отборочный тур-влакын чапле номерыштым 1 апрельыште Сеҥымашын ХХХ идалыкше лӱмеш тӱвыра полатыште ончаш йӧн уло. Толза! Вучена!
