31 майыште Йошкар-Олаште «Чумбылат могучий» национальный оперым ончыктеныт. Тудын авторжо — Марий Эл Республикысе сымыктышын сулло пашаеҥже, композитор Эллина Анатольевна Архипова. Оперым Эрик Сапаев лÿмеш опер да балет театрыште ямдылен. Тыгак Яков Эшпай лÿмеш марий кугыжаныш филармонийын артистше-влакат ушныт: «Марий Эл» Кугыжаныш куштышо ансамбль да Искандаров лÿмеш капеллын артистше-влак. Опер моткоч ойыртемалтше да ушеш кодшо лийын. Молан манаш гын ты оперыште хореографийлан Денис Фейзов вуйын шога. Шке жапыштыже тудо «Юнона и Авось», «Иисус Христос — суперзвезда» спектакль-влакым шындымаште чапланен.
«Чумбылат могучий» опер марий калык онын илыш корныж дене тичмашын палдара. Эллина Архипова кумдан палыме преданийлан эҥерта. Возымо почеш Чумбылат Немда эҥер сер воктене шочын-кушкын, патыр лийын, шке калыкшылан полшен шоген. Колымекшат, талешке марий-влакым аралаш мутым пуэн.