Икана школыш коштшо Мария ӱдырем ойла: «Авай, школыштына шочмо калыкемын илыме кундемысе сылне верла-влак нерген возаш каласеныт. Айда Марий Элысе нерген возена». А шоналтышна гын, ме Марий Элысе тыгай верлаште йӧршеш лийын огынал да нунын нерген нимом шот дене огына пале, кеч мый шкежат Йошкар-Олаште вич ий тунемынам, ӱдырем денат акам деке (Морко район Кокласолаште ила да школышто пашам ышта) кажне ийын гаяк унала коштына. А тыгай верлашке йӧршеш лекмаш укес. Намыс. Тений ӱдырнам Марий кундемын иктаж вержым ончыкташ намияшак шонен пыштышна.
Теве кодшо кечылаште Марий Эл гыч мӧҥгӧ толын шуна. Чодырасе кугу пожарлан кӧра шуко вере миен ышна шу, но Волжский районысо Корамас кундемыш Чоткар патыр деке да Мӱшылъерыш миен лекна. Тыште мыланна пеш чот келшыш. Чоткар патырже поснак виян койын шога, пуйто молыланат шке куатшым пуаш ямде. Мария ӱдырем ты кок вер нерген рефератым возаш кумылаҥе.
А вес гана толмо годым Козьмодемьянскысе Кава йымалсе тоштерыш да Юриныш Шереметев замкыш каяш шонымаш уло.
Елена Газина.
Пошкырт кундем,Нефтекамск ола.