Ты арнян Марий Эл гыч СВО-ш кайыше салтак-шамычлан Луганск ден Донецк Калык республиклашке, Херсон ден Запорожье областьлашке кок фуро гуманитарный грузым колтымо.
Землякна-влаклан квадрокоптерым, тепловизорым, тепловизионный прицелым Марий Элым Вуйлатышын кӱштымыж почеш налме. Марий Эл Республикын Бокс федерацийже кок квадроциклым, «Хантер» УАЗ автомобильым, дизель-генераторым, ноутбук ден принтер-влакым пуэн. Тыгак специальный военный операцийын участникше-влаклан кӱлешан арверым волонтёр-шамыч погеныт.
Нине посылке-влакым 4 сентябрьыште тӱрлӧ вер гыч кондымо да фурылашке оптымо. Вес кечынже тора кундемышке наҥгайыме, СВО кайыме кундемыште грузым чотак вучат.
Гуманитарный грузым колтымо пашам республикысе Правительстве Председательын алмаштышыже Степан Воронцов терген. Тудо ты пашашке ушнышо чыла еҥлан тауштен.
– Марий Элым Вуйлатыше Юрий Викторович Зайцевын кӱштымыж почеш черетан гуманитарный конвойым колтена. Грузым республикнан поро кумылан еҥже-влак полшымо дене чумыренна. Мом ме колтена, чыла тидым землякна-влаклан пуат, кудышт кызыт боевой задаче-влакым шуктат, –каласен Степан Воронцов.
