Советский район Экесола ялын чолга ӱдыржӧ Кристина Рябчикова изинек туныктышо лияш шонен да шонымашыже шукталтын. Тудо ӱмаште Марий кугыжаныш университетын Калыкле тӱвыра да тӱвыра-влак кокласе коммуникаций институтышто марий йылме ден литературым, англичан йылмым туныктышылан тунем лектын. Кызыт тиде направлений денак магистратурышто шинчымашым пога.
– Молан туныктышо? Молан марий ден англичан йылмылам ойырен налынат? – йодым.
– Кызыт 2-шо класс гычак англичан йылмым тунемыт гын, ме 5-ше классыште веле йот йылме дене палыме лийынна. Икымше урокак моткоч келшен. У йӱк, у буква-влак, изи ньогалан англичан шомак-влак оҥайын шоктеныт. Икмыняр шомакым ушыш пыштенна, ойлончым чоҥаш тунемынна да англичан йылмым чот сайын палыме гай чучын. А шочмо йылме ден сылнымут вӱрышкем ешыштак шыҥеныт. Ӱшнур школышто туныктышем-влак Зинаида Александровна Волкова ден Галина Никитьевна Бояринова тулым утыр ылыжтеныт. Нунылан кугу таум ойлем. 8-ше классыште марий литератур дене олимпиадыш кошташ тӱҥалынам, икмыняр гана сеҥыше радамыш логалынам. Йылме дене таҥастарымаште, сылнымут мыланем лишылрак. Мый изинек почеламутым лудаш йӧратем, – каласыш Кристина Семёновна.
Марий кугыжаныш университетыш тунемаш пурымеке, поэзийлан кумылан улмыжо тиде темылан пӧлеклалтше курсовой ден выпускной квалификаций пашам возаш таратен. Кристина изирак курслаште С.Эсаулован, вара Г.Сабанцев-Оярын лирикыштым школышто да вузышто тунемме методикым шымлен. Шанче вуйлатышыже – филологий науко кандидат, доцент Г.Н.Бояринова. Тудын дене пырля 25 статьям возеныт. Ӱдыр докладше-влак дене Йошкар-Олаште, Чебоксар ден Козьмодемьянск олалаште, Курыкмарий районышто эртаралтше конференций ден форумлаште выступатлен да ятыр гана сеҥыше радамыш логалын.
– Галина Никитьевналан шанче пашалан кумылаҥдымыжлан кугу таум ойлем. Шымлыме годым шуко ум пален налат да ончыкыжымат эре тыршыме шуэш. Конференций ден форумлаште моло уста еҥ-влакым колыштын, уш пойдаралтеш. Марий кугыжаныш университетысе туныктышо-влакын келге шинчымашым пуымышт кызытсе пашаштем кугу шӱкалтышым ышта, – чонжым почеш ӱдыр.
К.Рябчикова Медведево районысо Кузнецово школышто англичан йылмым ик ий наре туныкта. Эр гыч кечывал марте – пашаште, вара – университетыште. Тӱҥалтыште йӧсырак лийын гынат, йочам да шке предметшым йӧратымыже нойымашым мондаш полшат.
– Йоча-влакым йот йылмым тунемаш кумылаҥдаш куштылго огыл. Тӱҥалтыште шукынжо тудын кӱлешлыкшым огыт умыло ыле, вара кажне урокыш куанен вашкат. Ме, туныктышо-влак, нунын чоныштышт тулым ылыжтен моштышаш улына, – ойла самырык туныктышо.
Кристина Семёновна урокышто тӱрлӧ йӧным кучылтеш. Кутыраш жапым шукырак ойыра. Йоча-влакым шкевуя пашам ышташ тарата. Лишыл ийлаште ӱдыр-рвезе-шамычым шымлыме пашам, проектым возаш шӱмаҥдаш шона. Самырык еҥ-влак туныктымо аланыш кумылын толаш тӱҥалыт гын, ончыкылыкна волгыдо лиеш. Чылажат – нунын кидыште.
Христина АЛЕКСАНДРОВА.
Фотом еш архив гыч налме.