Марий кундемыште илыше ура чонан еҥ-влак элнам аралыше-шамычлан кертмышт семын полышкалат, тӱрлӧ йӧным кучылтын, кочкыш сатум, вургемым, моло кӱлешан ӱзгарым поген колтат. Марий кугыжаныш университетын пашаеҥже ден студент-влакат ты поро пашам шукертак шуктат. Кызыт нуно малыме арверым (простыньым, одеял ӱмбалым, кӱпчыкшӱргым) да солыкым ургат.
Тидын шотышто Калык тӱвыра да тӱвыра кокласе коммуникаций институт тӱвыра да сымыктыш кафедрын туныктышыжо, ты пашан ик кураторжо Ирина Геннадьевна Алексеева дене мутланышна.
– Ты сомылым тӱҥалаш МарГУ-н ректоржо Михаил Николаевич Швецов темлен. Ургаш тений февральыште пижынна. Тышке Калык тӱвыра да тӱвыра кокласе коммуникаций институтын да Общий ден профессиональный образований факультетын декоративно-прикладной творчество да технологий, кок профилян педагогический образований (технологий да информатике шотышто образований) направлений-шамыч дене тунемше ден волонтёр-влак ушненыт. Нунын пашаштлан мый да технологий да профессиональный образований теорий да методике кафедрын кугурак преподавательже Зинаида Юрьевна Максимова вуйын шогена.
Материалым университет пуа. Хлопковый сатин гыч ургена. Тидлан лӱмын оборудованийым: ургымо машинам, утюгым, генераторым, оверлокым –налме, – палдара Ирина Геннадьевна.
Ургаш кажне арнян тунемме деч ончыч але вара погынат.
– Кызыт студент-влак курсовой да диплом пашам возат, лекций ден семинарыш коштыт, жапышт шагал гынат, уло кумылын ургаш ушнат, сай лектыш дене куандарат. Нуно салтак-шамычлан кондымо пайдам шижыт, уло вийыштым пыштен тыршат.
Тыгак йӧршеш урген моштыдымо-влакат мыланна полшаш кумылаҥыныт, эркын дене нуным туныктена, куштылгырак пашам ӱшанена.
Шукерте огыл 45 постельный комплектым, 100 утла солыкым да тынарак салфеткым госпитальлаш урген колтенна. Кызыт вес партийым ямдылена, – ойла И.Алексеева.
МарГУ-н пашаеҥже-влак лишыл жапыште эше термобельем налын колташ шонат.
Теат поро пашалан ида ӧркане, ушныза.