***
У ий толеш. Йырваш сӧрал.
Шушаш ийлан ласкам сӧра.
Москошто таче у «пунчал»:
Уремым чот сӧрастараш.
Шолаш ончал, пурлаш ончал –
Чыла вере чинчан аршаш.
Чонем йӱла у ий кожла.
Тӱня кунам порешт йолга?
Мардеж коклан изиш чужла.
Элемын тиcтыже лойга.
Ме шучко черым сеҥена.
У ий, пиалым вучена.
Окса кӱлеш ман пеҥына.
Ош Юмо дечын ячена…
Ший, шӧртньӧ тӱс – чыла вере.
Чонлан ласкам ом керт верешт.
Кунам лиеш чонна поян?
Порештше калык икоян?
Поремше, юзо деч виян.
Поктен колта вувер-иям.
Трук ончыкемже ончалам,
Йыр коштыт, модыт «янлык-влак».
Ом уж коклаштышт аламам –
Лач поро модыш-лапчыклам.
Анна Алкечева, Марий Турек.
Ломбо
Кажне умыр сылне шошым
Ломбо ошын пеледеш.
Угыч ужым ломбым ошым
Теле йӱштӧ пагытеш.
Юзо теле мамык пунжым
Ломбо укшыш велалеш.
Сылне кудыр тӱрын сынжым
Чинче дене шерлалеш.
Омо тамле ломбын телым,
Ок тарване парчажат.
Лум пеледыш ден пеледмым,
Шижын огыл укшыжат.
Шып шогем, ончем ломбемым,
Йӧршын ом тошт тӱкалташ.
Йӱкынак чарем мардежым:
– Чыте, ок кӱл шӱшкалташ!
Телын сылне ик оръеҥже
Мондыш жапым шеледаш…
А тоштеш мо южо еҥже
Йӧсӧ годым пеледаш?
Ольга Эльтемерова, Советский район.
Рвезе лум
Телын ош ужгашке велын,
Тумыштен, я верын-верын.
Нӧргӧ капым модыктен,
Кӱшыч ӱлыкӧ йоген.
Рвезе лум, могай полмезе!
Ышт чыталте: икте, весе,
Паша сомылым коден,
Кӧ ончен окнаш пызнен,
Кӧ вашкен уремыш лектын,
Шӱлалтен, куат ден темын!
Мыйынат чонем ырен
Киса кайык гай лум ден…
Виктория Матвеева, Морко район
***
Лум лумеш, авалтен теле мландым,
Пӱртӱсна ош вургемым чиен.
Мый толам, аваем, тый вучалте
Шупшалам ал шӱргетым, миен!
Вет жапна шагалрак, тый ит вурсо,
Вашкена ме садак куанен.
Тый капка деке лектынак вучо,
Чот ӧндал ӱдыретым вашкен.
Мый улам тендан деч пеш тораште,
Ушыштемже эре шонымаш:
Кузерак аваем ден ачамже?
Йыҥгыртем, чон йодеш мутланаш.
Кеч кеҥеж, кеч ош теле тӱняште,
Ӧндалаш пӧртылам мый садак.
Куаналын куржам ваштарешда –
Аваем ден ачамже вучат!
Ольга Евсеева, Волжск ола
У ий!
У ий толын, сылне, сай!
Чыла тошто шеҥгек кай –
Илышна лиеш оҥай
Да сöрал, пеледыш гай.
Погынен муралтена.
Пашамат ме ыштена.
Лийже капкылна таза!
Мо кÿлеш эше тетла?
Марина Смирнова, Йошкар-Ола
Лум пырче
У теле тылзе. Волгалтеш.
Ик ӱдыр школыш ошкылеш.
Ший лум йога – тыгай шыма,
Да кидкопаш вашке шула.
Лум пырче пӧрдын савырна,
Модеш. Йомакысе шижмашым
Шке йырже тудо шочыкта.
Пырля пӧрдаш ӱжеш чылаштым!
А ушышто – У ий пайрем!
Тек лыҥ куан лиеш тений.
Ушнал пырляшке, ӱдыръеҥ!
Лум пырче дене таҥ тый лий!
Ольга Степанова, Морко район.
Тачеш йоча лиям
Толеш У ий – йомак пайрем,
Йоча-влак ден кож йыр мурем,
Коля ден Пырыс ваш куштат,
Маска, Мераҥ соваш куштат.
Йошкар Упшат пырля ушнен,
Вувер Кува коклаш ишнен.
– Молан огеш тол Кочайна?!
– Лумӱдыр кушто? Вучена!
– Йокма мешак уке алят, –
Герой-влак кычалаш каят.
Лумӱдыр, Йӱшто Кугыза
Омсаш пурат. Мешак – таза.
Рӱжге эрта йоча пайрем,
Куан ден шӱлалта урем.
Паша мочол гынат тунам,
Йоча воктен келшен мылам…
Эрталшым порын шарналтен,
У солыкемым шаралтем.
Рошто пайремым вашлиям,
Тачеш мыят йоча лиям.
Людмила Семёнова. Марий Турек.
У ий лӱшкен толеш
Ош талгыдым кычкен,
Ший шӧрмычым чиктен…
Яндар йӱкан ший оҥгыр
Торашке йоҥгыктен.
Лум пургыжым нӧлтен,
Ший теҥызым вончен,
Ужар тайга воктечын
Пасу дене чымен.
Сурт-пече волгалтеш,
Чес пуш ден ӱпшалтеш.
Чаркам темен, оза-влак
Унам сийлат – коеш.
Шагат тик-так коштеш,
Латкокытат шуэш.
Ялла ден олалашке
У ий лӱшкен толеш.
Кож йыр ме пӧрдына,
Ваш-ваш саламлена.
Йоча ма, кугыеҥ ма —
Кушташ ме кертына.
Ит вожыл, койышлане,
У ийлан тый куане.
А ончылно – ой, каныш!
У илышлан ӱшаныс!!!
Нина Щербакова, У Торъял район.
Теле
Ош мамык лум леведын мландым,
У ий тӧрзашке перкала.
Чучеш моткоч ласкан да ямлын,
Мый курыкыш каем эрла.
А таче мый ыштем мӧчӧрым,
Коньки ден мунчалтен ончем,
Вара ош лум гыч модыш пӧртым
Йолташ-влакем дене чоҥем.
Кӱлеш лудаш почеламутым –
Чыталте, Йӱштӧ кочаем!
Родемланат ыштем пӧлекым.
У ий пайремым чот вучем!
Кристина Быкова, Кужэҥер район.
***
Лум лумеш лыжган гына,
Кудвечыш погына.
Ош лумеш кыша кодеш,
Йолкопа гаяк коеш.
Лек уремыш, ӱдырьеҥ.
От керт садак ойырлен.
Чон шупшеш, шкежат палет,
Кунам чон таҥ воктенет.
Лумым тич кидеш налеш,
Чевер таҥлан пуалеш.
Чинче лум вашке шула,
Кидкопамым кылмыкта.
Ит ойгане, шӱмбелем,
Лум гына вашке шулен,
А шижмаш кужун ила,
Ӱмыреш ила, маннем.
Трук уремыште перна:
Мужыръеҥ шыман иеш,
Ик сурт воктелан чарна.
Ныл кыша кодеш лумеш.
Галина Сайтаева, Агрыз.
***
Лымжы вилеш мамык пынла,
Кидлапаштем анжен шылат
Лым пӹрцӹвлӓ, шижӹн шокшым,
Ак валгалтеп ӹнде ошын.
Кÿ йӓ шана, кÿ йӓ пӓлӓ?
Кидӹштем пӹлгом гӹц шӓлӓ!
Мамык шӹдӹр трÿк пытькалтыш,
Ӹнде тӹдӹ – вӹд патькальыш!
Лым пӹрцӹвлӓ, кыш вӹседӓ?
Äвӓ-пӹл гӹц айырлендӓ.
Тӓ темендӓ ире южым
Дӓ эртендӓ корным кужым.
Шӹмӓн тӓмдӓм рӹпшӓ мардеж,
Вижӹм шижӹн, йойын мадеш.
Телӹм вычен шон мÿлӓндӹ,
Лым лӹвӓлнӹ кӓнӓш йӓмдӹ.
Татьяна Иванова, Волжский район.