Идалык ончыч фотом печатлаш Йошкар-Оласе строительный техникум воктене верланыше салоныш пуренам ыле. Тунам ик пашаеҥ тусо йолташыже-влак дене марла мутланыш. Марий улмышт мыйым куандарыш. Сандене шукерте огыл адак тушко пурышым. Рӱдерын соцкыл лаштыклажым шергал лектым да тушто пашам ыштыше самырык еҥ-влак нерген кумданрак пален налмем шуо.
«ФотоYoshka» салоным Настя ден Сергей 2018 ий 16 апрельыште почыныт. Ончыч документ, фото-влакым печатленыт, вара темлыме услугышт эркын-эркын шукемын. Документлан фотом ыштат, шкеак печатлат, диплом пашам ургат, фотосувенир, фотопӧлек-влакым ямдылат.
Ончыч Анастасия пашам шкет ыштен. Сомыл ешаралтмылан кӧра пел ий ончыч Сергеят ушнен. Ӱдыр дизайн могырым ышта гын, рвезе утларакшым производственный да технический сомыллам шукта.
Настя Охотникова Волжский район Обшияр (Нурсола) ялыште шочын-кушкын. Сергей Борисов – Морко район Семисола ялын эргыже. Ӱдыр ден рвезе кандаш ий ончыч Марий радиомеханический техникумышто тунеммышт годым палыме лийыныт. Тунамак келшаш тӱҥалыныт.
2017 ийыште Анастасия фотостудийыш дизайнер-ретушерлан пашаш пурен. Ты сомыл ӱдырлан чот келшен, рвезе тидым умылен. Адакшым оксамат ышташ лиеш. Идалыкат пеле тушто пашам ыштымеке, Настялан рвезыже шке салоным почаш темлен. Тиде шонымаш дене чылан келшеныт. Ача-авашт, изашт чыла сай лиеш манын ӱшандареныт. Тидыже кок йӧратыше еҥлан ешартыш вийым пуэн. Кеч-могай пашамат пырля каҥашен ыштат, кажне у шонымашым лончылен, илышыш шыҥдарат.
«Мемнан пашаште тӱрлыжат лиеш, но тӱҥ шотышто технике шалана. Сандене кӱчык жапыште чыла тӧрлен, вес шапаш ужашым налын, заказым ямдылен шуктыман. Кунам пашанам аклат, уэш йодмаш дене толыт, мемнан пӧлекланна куанат, тидыже эн пиалан тат», – ойлыш Настя.
– Тыгай салоным почаш мыняр окса кӱлын?
– Тӱҥалтышлан 300000 теҥге кӱлын. Кок ий наре ыштен налме окса фотосалоным вияҥдаш ойыралтын: у оборудованийым, фотосувенир-влаклан заготовко-шамычым наледыме. Тыгак верым вашталтымылан кӧра кажне ийын арендылан ак кушкын. Ынде ме шке шонымашышкына шуынна: ола рӱдыштӧ верланенна.
– Бизнесым почаш неле?
– Куштылго паша огыл. Эн ондак айдемын шкенжын кумылжо лийшаш. Вет Моско олат вигак чоҥалтын огыл, садлан шке ончылно шындыме цельыш шуаш тыршыман да ӱшанлын ончыко ошкылман. А эн тӱҥжӧ – пашам йӧратыман.
Лӱдман огыл, йоҥылыш-влак лийыт гын, тунемман. Чыла нелылыкым сеҥен веле сай кӱкшытыш шуаш лиеш.
Умбакыжат нунын пашашт вораҥын толжо! Тек тиде изирак бизнесышт кугу лектышым конда.
Настян архивше гыч налме фото.