Ик каныш кечын Карина тукым изаже да еҥгаж дене пырля Йошкар-Олам ончалаш толын. Тыге ме палыме лийна.
Карина Шамиева Пошкырт кундем Мишкан район Измар ялыште шочын-кушкын. Тудын Даша шӱжарже ден Костя шольыжо улыт. К.Шамиева изиж годым ече дене кошташ, пӱртӱсым эскераш, сӱретлаш да книгам лудаш йӧратен. 7-ше класс марте Токтар школышто тунемын. Умбакыже Бирск оласе 7-ше №-ан школышто шинчымашым поген. Кызыт Озаҥ оласе медицинский университетыште тунемеш, пӱйым эмлыше врач лияш ямдылалтеш.
Кодшо ийын Озаҥ марий-влакын национальный культур автономийышт (НКА) Самырык-влакын кечыштым эртарен. Каринат тиде пайремыш миен, чолга марий-влак дене палыме лийын. Тылеч вара тиде автономийыш ушнен да тудын чолга участникшылан шотлалтеш.
– Ешем деч тораште илем, а тыште марий-влак улыт, да чонемлан ласка. Активист ден вуйлатыше-влак мыланем кокымшо еш гай чучыт. Ушем пелен «Лай мардеж» ансамбль пашам ышта, мыят тушко мураш да кушташ коштам. Ме, самырык-влак пырля ончыкылык паша нерген чӱчкыдын кутырена.
2018 ий телым мыйым молодежный лидерлан сайленыт, а шукерте огыл Озаҥ оласе марий-влакын НКА-штын правленийышкышт пуртеныт. Ты автономийым Людмила Ивановна Мусихина вуйлата. Организаций 1992 ий годсек пашам ышта. Ме тӱрлӧ пайрем-влакым эртарена. Тыгак 1 июньшто Семык пайремыште эртаралтше «Чевер марий ӱдыр», «Марий патыр» конкурс-влаклан участник-шамычым ямдыленна. Мемнан автономийын чапшым Надежа Шишкина ден Александр Александров араленыт. Тыгак «Кугезе тукым ритм» ансамбль дене куштымашым ончыктенна. Шукерте огыл «Марийское наследие» фестивальым эртаренна. Тидын дене грант оксам сеҥен налынна. Мемнан деке Марий Эл гыч Раисия Данилова, «Алан» ансамбль, «Чинчывий» кӱслезе ансамбль, Пошкырт кундем гыч Васли Ольош да молат толыныт. Тыгак выставке-влак лийыныт. Мутлан, Марий Эл гыч этнодизайнер Евгения Кошкина шке пашаж дене палдарен, Свердловск кундем гыч Тамара Костина тӱрым тӱлымӧ мастер-классым эртарен,– каласыш ӱдыр.
Яра жапыште Карина книгам лудеш. Пауло Коэльон «Алхимик» книгаже тудлан поснак келшен. Пӱртӱсыштӧ шуко жапым эртара. «Тушто мыйын чонем кана, тӱрлӧ оҥай шонымаш-влак ушыш толыт», – манеш. Южгунам гитар але фортепиано дене шокта. Тидлан тудо шке гыч тунемын, изиш гына туныктышо деке коштын. Тыгак ӱдыр волонтёр-медик да тыглай волонтёр семынат полшаш коштеш.
– Карина, тый денет каныш кечын Йошкар-Олаште вашлийынна. Тый тыште икымше гана улам маньыч. А мо тыйым тышке толаш таратен?