Тиде арнян Звенигово олаште Россий кӱкшытан XVII Марий самырык тукым слёт эртаралтеш. Тушко Марий Эл, Пошкырт, Татарстан, Киров, Свердловск да Пермь кундемла гыч, Моско, Санкт-Петербург, Тюмень олала гыч 100 утла ӱдыр-рвезе толын.
Тений слёт Кугу Отечественный сарыште сеҥымылан да Шочмо элым аралышын идалыкшылан пӧлеклалтын. Сандене участник-влаклан «Талешке тукым» усталык конкурс увертаралтын. Тушко ӱдыр-рвезе-шамыч шке тукымыштын ветеранышт дене палдарыше видеопрезентацийым ямдыленыт. Сеҥыше-шамычым кугарнян палемдат.
– Слётын программыже кажне кечын поян да кумда. Участник-влак тӱрлӧ темылан лекцийым колыштыт, проект-влакым возаш тунемыт, тӱрлӧ марий сувенирым ыштыме мастер-класслаште участвоватлат, волейболла, баскетболла, футболла модыт. Тылеч посна вӱргечын, изарнян да кугарнян Звенигово ола да район мучко экскурсий-влак эртаралтыт. Самырык еҥ-влак оласе краеведений тоштерыште, калык кидмастар пӧртыштӧ, Сергей Бутяков лӱмеш судным чоҥышо да ачалыше заводыш, тыгак Чакмарий селаште лийыт. А 11 июльышто Волжский район Олыкъялысе Зинон Прохоров лӱмеш тоштер-пӧртын коллективше Совет Ушем Герой Прохоров нерген «Вода чувствует» иммерсионный спектакльым ончыкташ толеш, – каласкалыш Мер-политике рӱдерын специалистше Галина Ласточкина.
Слётышто лектор-влак самырык тукымым туризм, йылме, еш, медиа, тӱвыра кейс-влак дене пашам ышташ туныктыт. Тидын дене ӱдыр-рвезе-шамыч шонымашке шуаш, нелылыкым сеҥаш тӱрлӧ йӧным кычалыт.
Вӱргечын «Саскавий» марий ӱдырамаш ушемын еҥже-влак дене вашлиймаш лийын. Тушто участник-шамычлан Кугу Отечественный сарыште ӱдырамашын рольжо нерген каласкаленыт. Тиде кечынак «Слётын мистер ден миссше» конкурс эртаралтын. Чыла участник чолга да уста лийын.
Каласыман: слёт Марий Элысе Тӱвыра, печать да калык-влакын пашашт шотышто министерствын, Марий Элысе Молодёжный политике комитетын полшымышт дене эртаралтеш. Чылаже 20 утла еҥан вич лужа пашам ышта.
Спорт тудлан вий-куатым пуа
Звенигово район Эсмекпляк селан ӱдыржӧ Дарья Петрова 16 ияш веле . Тудо 10-шо классыш вончен. Изинек спортлан шӱман кушкеш.
– Мый икымше гана тыгай слётыш ушненам. Нылымше лужаште улам. Программе пеш оҥай. Марий йылме, историй дене кылдалтше шуко уым пален налынам, – манеш Даша.
Д.Петрова волейболла модеш. Куштылго атлетике дене районысо да республикысе таҥасымашлаште писылыкшым ончыкта. Икымше эше лийын огыл, но призовой верыш логалын. Эше чылажат тудын ончылно. Сеҥымашке шуаш чытыш, кумыл да тыршымаш кӱлыт. Тидыже Дашан уло.