17-23 июнь – Физический чолгалыкын кӱлешлыкше нерген палдарыме арня
Кызыт еҥ-влак тазалык нерген утларак шонаш тӱҥалыныт: тамакым шупшмым, аракам йӱмым чарнат, спорт дене кылым кучат. Кузе тудым аралаш да эшеат пеҥгыдемдаш? Ик каҥаш гына – таза илыш-йӱлам кучаш, тыге ӱмырнам утыр шуен кертына.
Марий Элысе калык тазалык да медицине профилактике рӱдерым вуйлатыше Надежда Фролова тыгак нине правилым кажне кечын шукташ темла:
шукырак тарванылза, кечыште пел шагат деч шагал огыл йолын коштса;
клетчаткан да тичмаш пырчан кочкышым утларак кочса, пакчасаска да фрукт нерген ида мондо;
кечыгут вӱдым шукырак йӱза, тидыже коваштыланат пайдале, кужунрак самырык кодаш полша;
ик жапыштырак малаш вочса да кынелза;
утыжым ида пуштылане, чыла вере сайым гына шекланаш тыршыза;
организмдам пеҥгыдемдыза, тидлан йӱштӧ-шокшо вӱдан душ пайдале;
поро пашам ыштыза.