Самырык еҥын кидыштыже гармонь модеш веле! Ик семым луктеш, весым савыралеш, тыге калыкым шке йырже чумыра. Параньга район Олор ял гыч уста гармоньчо Сергей Савинов кеч-могай концертым сӧрастараш полша. Тудо «Муро ӱмырым шуя» проектын ик чолга участникше.
Сергей изинек усталыкше дене ойыртемалтын: мураш-кушташ йӧратен, тыгак семӱзгарлан шӱман лийын. Волжский район Карай ялеш шочын, Параньга район Олор ялыште кушкын. Параньга посёлкысо йоча сымыктыш школышто баяным кок ий шокташ тунеммыже усталык корнышко лекташ негызым ыштен. Варажым гармоньлан шӱмаҥын. Тунам пошкудо-шамычымат сылне сем дене куандарен, концертышкат лектын ончен. Таче гармонь тудын ик эн йӧратыме, кумылым налше, чоным лыпландарыше семӱзгарыш савырнен. Волжский, Параньга районлаште эртаралтше ятыр сӱаныш шокташ коштын, ӱжыт гын, тачат кая.
– Икмыняр ий ондак Карайысе «Шийгорно» ансамбль дене Советский районыш Ӱярня пайремыш миен коштынна. Туштак мый Лиана Ильина, Валерий Чиванов дене палыме лийынам. Ӱмаште Лиана мыйым ты проектыш ушнаш ӱжӧ.
Сценыште лияш йӧратем, лӱдын-вожыл ом шого. Вет изинек Карайысе «Шийгорно» ансамбльыш мураш-кушташ коштынам. Варажым Волжскышто ик техникумышто тунемме годым клубышто аккомпаниаторлан ыштенам. Тунам мый гармоньчо-влак коллективым чумыренам, чылаже ме кудытын лийынна. Таче составыш коштшо шагалемын. Кызыт яллаште шагал еҥ гармоньым шокта. А мыланем ты семӱзгар келша. Ончыкылан мурым лукташ шонем, – мане С.Савинов.
«Муро ӱмырым шуя» проект почеш Сергей Савинов тӱрлӧ верыш миен шуын. Гармоньым шоктен, тӱрлӧ марий такмакым йоҥгалтара. Тыге ончаш толшо-влакым кушташ тарата, кумылыштым нӧлта.
