Татьяна ИБАТИЕВА, Озаҥ ола:
– Авам Надежда Павловна Петрова (Садовина) У Торъял район Чашкасола ялеш шочын. 1984 ийыште Шернур район Йошкар Памаш ялышке марлан толын. Пошкудо Лӧпӧ ялыште ятыр ий кевытыште пашам ыштен. Пытартыш ийлаште ялысе тӱҥалтыш школышто поварлан тыршен.
Кызыт авам – сулен налме канышыште. Эрик ачам дене пырля кок эргым да ик ӱдырым ончен куштеныт, 5 ӱдыр уныкашт уло.
Авам – творческий шӱлышан ӱдырамаш. Йошкар Памаш клубысо ансамбльыште ятыр ий мурен-куштен, районысо мероприятийлаштат шке мастарлыкшым ончыктен, Марисола администраций лӱм дене икмыняр гана чапкагаз дене суапландаралтын.
Тудын кумылжо, калыкым йӧратымыже изам-влаклан да мылам кусненыт. Тудо мемнам чолга да виян лияш туныктен. Тау тылат, авай!