Волжский район Сотнур школышто 15 майыште туныктымо пашан ветеранже Анатолий Александрович Сапаевым шарныме лӱмеш мероприятий лийын. А.Сапаевлан, ила гын, 4 мартыште 70 ий темеш ыле.
Эре йоча-влак коклаште
А.Сапаев Волжский район Нурмучаш Шайра ялыште шочын. Марий кугыжаныш университетын историй да филологий факультетшым тунем лектын да шочмо кундемышкыже пӧртылын. Ярамарий, Руш Шайра, Нурмучаш Шайра, Сотнур школлаште пашам ыштен, марий йылме ден литературым, ИКН предметым туныктен. Волжский районысо Пионер-влак пӧртыштӧ, Сотнур школ пеленысе Йоча усталык пӧртыштӧ тыршен. Сулен налме канышыш лекмекат, пашам ыштен. Кугу Корамас ден Сотнур школлаште «Сылнымут сескем» кружокым вӱден. Ты ушем 2005 ийыште Марий Элысе эн сай ушем лийын, В.Исенеков лӱмеш призым сеҥен налын. Йочаже-влакын возымышт республикысе газет ден журналлаште савыкталтыныт. Шкежат шочмо кундемысе илыш, землякше-влак нерген кумылын серен, кажне айдемын ойыртемжым ужын-шижын моштен. Мемнан редакцийышкат шуко статьям конда ыле.
А.Сапаев ӱдыр-рвезе-шамычым тӱрлӧ почеламут конкурсыш: «Волшебное русское слово», Колумб лудмаш, «Самырык тукым» да молат – ямдылен да коштыктен. Нуно эре сеҥышыш лектыныт. Шкежат тыгай мероприятийлаште мастарлыкшым терген да ятыр гана ойыртемалтын.
Туныктышым шарнен…
Мероприятийышке погынышо туныктышо, тунемше, уна-влак А.Сапаевым шарналтен, тудын нерген ятыр поро мутым ойленыт. Чыланат иктым поснак палемденыт: Анатолий Александрович ура чонан, кугу вий-куатан айдеме лийын, чон йӱлен пашам ыштен, уло жапшым, вийжым йоча-шамычым туныктымылан, шуарымылан пуэн.
Вара почеламутым лудмо конкурс лийын. Тушко Волжский районысо Кугу Корамас, Сотнур, Памар, Карай школла гыч тунемше-влак ушненыт. 1-4-ше да 5-7-ше класслаште сеҥыше-влакым палемденыт. Туныктышылан пӧлеклалтше тынар сылне почеламут йоҥгыш!
Мероприятийым организатор-влак пеш сайын ямдыленыт. Тудо моткоч ласкан, чонеш логалшын эртен. Ӱшанена, тыгай мероприятий йӱлаш пура да пагалыме туныктышо А.А.Сапаев нерген шарнымаш эре илаш, туныктышо-влакын суапле пашашт эре аклалташ тӱҥалеш.
А.Сапаев ден пелашыже Лидия Михайловна 44 ий пырля иленыт, Игорь эргым (Сотнур черкыште бачышкалан ышта) ончен куштеныт, вич уныкашт уло. Шарныме касыште Роман почеламутым йоҥгалтарыш, Маша ден Даша йыгыр ӱдыр-влак шиялтышым шоктышт.
Авторын да еш альбом гыч налме фото-влак.
