Тугеже куатшудо (девясил) полша. Тудо артроз, артрит, подагре, седалищный нерве, шылыж, тупышто але ваче тураште чогашыл корштымо, моклештме годым пайдале.
Сусыр верыш йыгаш спиртан настойкым ямдылаш лиеш. 100 мл ош аракаш 1,5 кугу совла коштымо вожым пыштыман, 12 кече шинчыктыман да шӱрыман.
Свежа вожым пушкыдеммешкыже шолтыман, немыр гай лиймешке тыгыдемдыман да корштышо верыш пыштыман, иктаж шовыч дене пӱтыралман, 10-20 минут кучыман.
Куатшудан ванныште кияш пайдале. Пеллитр шокшо вӱдыш 100 грамм вожым пыштыман, кум-ныл шагат шинчыктыман. Вара изи тулышто 20 минут шолтыман, шӱрыман да ваннысе вӱдыш ешарыман. Тушто малаш вочмо деч ончыч 15 минут кийыман. Лу гана тыге ышташ лиеш.
Куатшудо лемым але настойкым ик-кок кугу совла дене кочмо деч ончыч 10-14 кече йӱман.