15 сентябрьыште Чодыра пашаеҥ-влакын кечынже ты отрасльыште тыршыше-влакым Марий Элым Вуйлатыше Ю.Зайцевын лӱмжӧ дене республикысе Правительстве Председательын алмаштышыже Д.Троицкий саламлен.
Марий Элыште «Экологий» нацпроектын «Сохранение лесов» региональный проектше почеш паша 2019 ий годсек шукталтеш. Тудын дене келшышын, чодыра пожарым йӧрташ 61 техникым да 539 противопожарный оборудованийым налме. Ынде тачылан «Авиалесоохране» предприятийын 103 лесопожарный техникыже уло (план почеш 99 лийшаш).
Республикысе Правительстве Председательын алмаштышыже Д.Троицкий чодыра отрасльысе пашаеҥ-влакым шочмо кундемын пӱртӱс поянлыкшым шукемден шогымыштлан да пожар лӱдыкшыдымылык шотышто тыршымыштлан тауштен. Тыгак СВО-што передовойышто улшо да нунын ешыштлан полшымышт нерген каласен. 2023 да 2024 ийлаште 30 фуро полышым колтеныт. Спецопераций тӱҥалме деч вара 434 ешлан пум намиен пуэныт.
Варажым Дмитрий Троицкий пайремле мероприятийыш погынышо-влакым саламлен да ойыртемалтше-влаклан наградым кучыктен.
Тыгак чодыра пашаеҥ ден ветеран-шамычым республикысе Правительстве Председательын алмаштышыже Степан Воронцов саламлен. Тудо тендан пашада элнан национальный поянлыкшым чын кучылтмо да шукемден шогымо дене кылдалтын манын.
Марий Элым Вуйлатышын пресс-службыжын фотожо.