Ик мотор кеҥеж кечын йолташем-шамыч дене, эҥер воктене шылым кӱкташ тарваненна. Тушко ме малымыла миенна. Палатке-влакым чодыра тӱр воктене вераҥдаш кутырен келшенна. Тушеч эҥер деке волаш да йырым-йырысе пӱртӱсым эскераш йӧнан лийын.
Намийыме погынам луктеден, ӱдыр-влак ӱстелым погаш, каче-шамыч, тулым ылыжтен, шылым кӱкташ тӱҥалынна. Икманаш, кажныже могай-гынат сомылым шуктен. Кас марте эре кочкынна, йӱынна, йӱштылынна. Пычкемышалтмеке, палатке-влакым шогалташ пижынна. Волгыдо лийже манын, мландыш фонарик-шамычым пеҥгыдемденна да чӱкталтмыштым вученна. Но нуно чӱкталтын огытыл. Пиалешна, пелен налме керосин лампе лийын. Ты лампе кеч изиш пычкемыш йӱдланна волгыдылыкым пуртен. Палаткым йӱдым веле шогалташ тӱҥалынна. Кунам рвезе-шамыч тудын деке каеныт, машина багажникыште муын огытыл. Чот ӧрынна. Чыланат чодыра воктене палаткым кычалаш пижынна. Керосин лампе дене утыжым торашке каяш лийын огыл, пеш начарын волгалтарен.
Йӱд. Пычкемыш. Йӱштӧ. Лӱдыкшӧ. Кокланже чодыраште тумна але кайык овда кычкырлен. Йӱкышт деч капкыллан копыж чучын колтен. Тул воктечын утыжым торашкат кайыме огыл гай чучеш, но, палаткым кычалшыла, куп воктеке миен лектынна. Тушто рвезе-влак дене туманлаш тӱҥалынна да йолташ ӱдырем дене, нуным коден, мӧҥгеш каенна. Тунам мыланна чот шучкын чучын, лӱдмына дене коктынат мӱгырен шортынна. Вара йолташ ӱдырем «Чодыра оза, мемнам ит лӱдыктыл, корным ончыкто» манын. Тудым ончен, ушыжо каен, шоненам, да эшеат чот шортынам. Тыгодым изиш ӧрдыжтырак изирак капан (50-60 наре сантиметр) айдемын ӱжакаже койылден. Тудо понарым волгалтарен да почешыже каяш кӱштен. Йолташ ӱдырем тидлан моткоч йывыртен да воктечем тарванен ошкылын. Мыят – почешыже. Варажым мо да кузе лийын, нимом ом шарне. Эрвелеш таҥем пычкемыш йӱдым туманлымылан да коден кайымыжлан проститлаш йодын. А йолташ ӱдырем изи капан айдеме чодыра оза лийын, манын.
Рита Т.
Юрино посёлко.
freepik сайт гыч налме фото.