Шукерте огыл Татарстан Республикысе Лубяны селаште «Леса и инновации» школ лесничестве-влаклан VII слёт эртаралтын. Тушко Марий Элысе Эколого-биологический йоча рӱдерын «Великолепный лес» школ лесничестве командыже миен коштын.
Участник-влаклан Лубянский лесхозтехникум, тусо тоштер, стадион, дендрарий мучко экскурсийым эртареныт. Ӱдыр-рвезе-шамыч «Чодыра викторине» уш-акылым тергыме модмаште, «Самырык лесовод-влак» конкурсышто таҥасеныт. Нуным мастер-класслаште корзиҥгам пидаш, лышташыште сӱретлаш, сортам ямдылаш, пу шер гыч кидшолым ышташ туныктеныт. Спорт да каныме мероприятий-влакат лийыныт.
Тенийысе слётыш 31 команде миен. Марий Эл да Чуваший гыч команде-влак конкурс зачётыш пурталтын огытыл. Туге гынат, конкурслам иктешлымеке, вич эн сай команде-влак радамыш логалын.
Марий Элысе Эколого-биологический рӱдерын архивше гыч налме фото.