Палыме марий писатель Ю.М.Артамоновын шочмыжлан тений 6 апрельыште 85 ий темын.
Тудо мемнам 21 ий ончыч (2002 ий 24 август) коден каен гынат, усталык пашаже ӱмырешлан кодын. Писательын произведенийлажым школлаште тунемыт. Ме «Перкан кинде» повестьше дене палыме лийынна, варажым тудым «Сукыр» манын лӱмдышт. Кинде нерген кузе тудо умылтарен возенже!
Марий самырык театрыште «Чодыра юзо» повестьше негызеш драматург Геннадий Гордеев пьесым возен. Ты спектакльым писательын лӱмгечыж вашеш келыштараш шонен пыштеныт. Тудым кодшо тургымышто театр полатым ачалаш тӱҥалме деч ончыч изирак тӱшкалан ончыктышт. А 26 сентябрьыште «Чодыра юзо – ОВДА» премьерым М.Шкетан лӱмеш Марий драмтеатрын сценыштыже ужына.
«Молан Юрий Артамоновын повестьшым ойырен налында?» – йодым Геннадий Филимонович деч. Тудо тыгерак вашештыш:
– Пытартыш жапыште Юрий Михайловичын лӱмжӧ огеш шокто. Сандене лӱмгечыжлан тудын пашажым калык коклаш лукмо нерген шоналтышым. Вет Артамонов мыйын творчествыштем икымше эҥертышем лийын. Студент улмем годым тудын полшымыж дене «Ончыко» журналыште 1981 ийыште «Вучыдымо увер» ойлымашем савыкталте.
Ик палымем Юрий Артамоновын «Чодыра юзо» повестьшым ончал лек, сай спектакль лийын кертеш манын темлен ыле. Повестьым лончылымо, тудым пьесыш савырыме пашам кок ий ончычак шуктенам. Но ала-можо кӱчымын чучын, сандене тудым ешараш кӱлмым шижынам. Тыге повестьше негызеш у пьесе шочо. Тудым эн ончыч Эрвина ӱдыремлан лудаш пуэнам. Эрвина куанен каласыш: «Режиссёр семын постановкым ыштем, тыгай сынан пьесым шындыме нерген шукертсек шонен коштынам».
