Марий Элыште «Стрелки – выход из леса» проект пашам ышташ тӱҥалын. Тудо еҥ-влаклан чодыраште кошташ лӱдыкшӧ ынже лий манын ышталтын. Проектым общественный региональный утарыше отряд илышыш шыҥдара.
Корно-влак ушнымаште вераҥдыме волгыдо указатель-влак чодыра гыч лекташ лишыл корным ончыктат. Указательлаште утарыше службыш йыҥгыртен каласаш координатым палдарыше номерат уло. Организатор-влакын мутышт почеш, стрелке-влакым пушеҥгылашке кок метр деч утларак кӱкшытыш вераҥдыме, изиш ӱлнырак, шинча тураште, информационный табличкым муаш лиеш.
Кызытеш «Марий Чодра» заповедник йыр 14 указательым вераҥдыме. Марий аварийно-утарыше службын увертарымыж почеш, тыште еҥ-влак чӱчкыдын йомыт. Заповедникыште шкеныштынат навигацийышт уло. Указатель-влакым канаш толшо-влакын заповедник деч ӧрдыжкӧ лекме верлаште пижыктыме.
Утарыше отряд-влак ты пашам тений умбакыжат шуяш шонат. Вашке Суслоҥгер, Силикатный посёлкыла, Кучки да Шап ялла тураште указатель-влак лийыт.
Ирина ЗОЛОТАРЁВА.