17 апрельыште Йошкар-Оласе Мер-политике рӱдерыште «Гильдия строителей Республики Марий Эл» организацийын ассоциацийжын еҥже-влак собранийым эртареныт. Тушто 2022 ийыште ыштыме пашам иктешленыт да тенийлан ыштышаш сомылым палемденыт.
Марий Элым Вуйлатыше Ю.Зайцев республикысе чоҥышо-влакын пашаштым кӱкшын аклен да корным ыштыме, илыме верым чоҥымо, тыгак транспорт ден коммунальный, социальный инфраструктурым вияҥдымаште ончыкыжымат тыгак талын пашам ышташ тыланен.
– Чоҥымо комплекс дене пырля национальный проект-влак почеш паша умбакыже кая. Республикыште инфраструктурный проект-влак илышыш пурталтыт, нуно илыме верым чоҥымо сомылыш инвестицийым ешараш условийым ыштат, – ойлен Ю.Зайцев.
«Гильдия строителей Республики Марий Эл» советын вуйлатышыже Х.Баширов ассоциацийын ӱмашсе паша лектышыж нерген каласкален, тыгодым у кӱкшыт-влак нерген ойлен да лекше нелылыкымат палемден. Объект-влакым сай качестваным да палемдыме жапыште сдатлена манын ӱшандарен.
– Республикын чоҥымо отрасльыштыже кӱлеш чоҥымо материал производствым вияҥдыман, тидлан у да кӱкшӧ технологийым кучылтман, – каласен Ю.Зайцев.
Д.Речкинын фотожо.