Тыгай мутым теҥгече Марина Беляева Санкт-Петербург гыч Йошкар-Олаш чоҥештен толмо годым колын.
Тудо 5-14 сентябрьыште Санкт-Петербургышто «Невская краса» конкурсын финалыштыже участвоватлен.
Ты жапыштак «Мир, доступный для всех» лӱман форум эртаралтын. Тушто начар тазалыкан еҥ-влакын тӱрлӧ йодышыштым каҥашеныт.
Конкурсышто да форумышто Марий Эл гыч Марина Беляева участвоватла. Моторлык таҥасымаш шымше гана эртаралтын. Тушто Марий Эл гыч начар тазалыкан ӱдырна-влак ондакат лийыныт да тӱрлӧ номинаций дене палемдалтыныт. 2017 ийыште Ольга Пасеева ден Анна Матвеева сеҥышыш лектыныт ыле.
Ты гана Марий кундемын чапшым Медведево район Знаменский посёлкышто илыше М.Беляева арален да финалыш логалмыжымак сеҥымашлан шотлаш лиеш. А такшым Маринам «Леди Улыбка» номинацийыште палемденыт.
Марина мыланем тыгерак возен колтыш:
«Самолётысе изи тӧрза гыч кугу олам ужам. А ушем дене виян еҥ-шамыч оҥай вашлиймаш-влакым шарналтем. Петергофышто, Крондштатыште лийынам. Пеледыш аршашым моторын ышташ, чия дене сӱретлаш, массажым ышташ тунемынам. Ола мучко байк дене да Нева эҥер мучко кораблик дене коштмо. Шкемын у койыш-шоктышемат пален налынам. Стилист ден визажист-влакын юозо пӧлемыштышт лийынам. «Невская краса» гай меоприятий-влак чынжымак кӱлыт! Айста шочмо кундемышат тыгай сынаным эртарена. Ял гыч толшо начар тазалыкан еҥ-шамычлан тидыже путырак келша, шонем. Мутлан, причёскым ышташ, кафеште кочкаш, экскурсий дене кошташ лиеш».