Чоҥен пытарыдыме пӧртым страховатлаш лиеш мо? Тыгодым могай условийым шуктыман? Тиде йодышлан юрист Алексей Инородцев вашешта:
РФ Гражданский кодексын 930-шо статьяж почеш кеч-могай погым страховатлаш лиеш. Но тидым погын озаже ыштышаш.
Гражданский кодексын 150-ше статьяж почеш чоҥен пытарыдыме объектат кусараш лийдыме погылан шотлалтеш. Тыгай погылан правам кугыжаныш регистраций тӧнеж регистрироватла, тидын нерген посна кугыжаныш реестрыш записьым пурта. Но шукын, пӧртым чоҥен пытарымешке, тудлан правам огыт регистрироватле. Чын дене каласаш гын, тидын кӱлешыжат уке.
Российысе страховой компаний-влакын погым страховатлыме правилыштым иктешлен лекмек пале: чоҥен пытарыдыме пӧртым регистрироватлыме огыл гынат, тудым страховатлаш лиеш.
Кодексын 943-шо статьяж почеш страхований ойпидышын условийже посна Страхований правилыште савыкталт кертеш. Шукыж годым страховой компаний-влак ойпидышыште тыгай Правил почеш ссылкым ыштат. Сандене страхований ойпидышым ыштыме деч ончыч тӱрлӧ страховой компанийын тыгай пӧртым страховатлыме Правилжым иктешлен лекман.
Мутлан, южо страховой компаний чоҥен пытарыдыме пӧртым огеш страховатле. Леведыш йымалне, чыла тӧрза проём-влакым кермыч, але вес чоҥымо материал, але оҥа щит дене петырыме гын веле страховатлат. Тыгак пӧрт йыр мланде печылыме лийшаш.
Тыштак каласыман: чоҥен пытарыдыме пӧртым страховой полис чоҥен пытарыме пӧрт дене иктӧр лӱдыкшӧ деч арала. Тиде: пожар, газ баллон пудештме, волгенчылан кӧра тул пижме, тӱрлӧ коммунальный аварий, стихийный бедствий да молат. Чыла тидым Страхований правилыште ончыман.
Тендан чоҥымо пӧртдам ойырен налме страховой компанийын Страхований правилже почеш страховатлаш лиеш, да тиде правил тыланда келша гын, тыгай компаний дене страхований ойпидышым ышташ лиеш.