15 мартыште Марий Элым Вуйлатыше Промышленность, экономике вияҥмаш да торговльо министерствын коллегийжын заседанийыштыже лийын.
Тудым почмыж годым Ю.Зайцев тӱҥ социально-экономический показательла дене сай пашам палемден. «Теве промышленный производство 14,1 процентлан кугемын, ПФО-што 2-шо верым налына, Российыште – луымшым. Экономикын базовый отрасльжын валовый региональный продуктшо дене ужашыже 30 процент утла лийын. Промышленность экономикыште 30 процентым авалта, чыла налогын 40 процентше лиеш», – каласен Марий Элым Вуйлатыше.
Юрий Зайцев ешарен: министерстве инвестиций да предприниматель сомылым саемдаш тырша.
Кызыт Марий Элыште 186 инвестиционный проект почеш паша шукталтеш. Нунын акышт 43 млрд утла теҥгешке шуын.
Кызыт амалкалче сомылым 96 тӱжем утла еҥ шукта. А республикысе экономикыште изи да кокла бизнесын ужашыже 27 процентым айла.
Нацпроект почеш паша сайын шукталтын. 2023 ийыште 47 региональный проект почеш сомылым ворандарыме. Кодшо ийын гына 23 социально кӱлешан объектым чоҥымо але олмыктымо.
Тыгак Марий Элым Вуйлатыше палемден: догазификаций дене кундемна Российыште кумшо верым айла.
Промышленность, экономике вияҥмаш да торговльо министр С.Крыловын мутшо почеш, 2023 ийыште республикыште ыштен лукмо чыла сатун да услугын акше 4 процентлан кугемын, чоҥымо паша – 21,7 процентлан, розницыш ужалымаште оборот – 4,6 процентлан.
Республикым социально-экономически вияҥдыме программе почеш шуктымо сомыл 1000 утла паша верым ышташ, 6,7 млрд теҥге бюджет деч ӧрдыжсӧ инвестицийым кондаш, 13 социально кӱлешан объектым чоҥаш полшен.
2024 ийыштат инвестицийым, предприниматель ден внешнеэкономический сомылым шукемден толаш да моло пашамат палемдыме.
Д.Речкинын фотожо-влак/Марий Элым Вуйлатышын пресс-службыжо.