20 майыште У Торъял район Тошто Торъял школышто пытартыш йыҥгыр йоҥгалте. Тиде кече календарьыште пайрем семын палемдалтын огыл гынат, тудым Россий мучко пайремлат.
Ме, 11-ше классыште тунемше-влак, тиде татым шӱм вургыж вученна. Тиде кечын куаненнат, шинчавудымат ӱштынна, ончыкылык илыш нергенат шонкаленна. Йоча пагыт эртен, кумда илыш корныш ошкылым ышташ жап шуын.
Классыштына куд тунемше лийынна. Икымше туныктышына Милия Васильевна Торощина мемнам возаш, лудаш, шотлаш туныктен. Ме, изи артист-влак, йомак-влакым модын ончыктенна. Нылымше классыште республикысе конкурсышто У ий йомак дене икымше верыш лектынна.
Визымше классыш вончымеке, Э.И.Киткаева «кокымшо авана» лие. Эльвира Ивановна руш йылме ден литературым туныкта. Теве шым ий шижде эртен кайыш, ме пытартыш йыҥгыр пайремыште шогена. Школым вуйлатыше, туныктышо, уна-влак, ача-авана мемнам саламлат, ончыкылыклан эн поро тыланымаш шомакым каласат.
Меат туныктышына-влаклан тауштена, вет школыш изи ньога толынна да 11 ий жапыште нунын шинчаончылнышт кугу ӱдыр-рвезе лийын шогалынна. Школым вуйлатыше Иван Николаевич Ельмекеевлан, класс вуйлатыше Эльвира Ивановна Киткаевалан, чыла туныктышылан кугу таум каласена!
Тошто Торъял школын тенийсе выпускникше-влак.