але Августын пытартыш кечылаштыже мом ыштен шуктыман
—
Идалык мучко вучен коштмо кеҥеж пагытын икмыняр кечыже гына кодын, а вара – адакат тунемме ий. Туге гынат шӱлык кумыллан шкендам авалташ ида пу. Августын пытартыш кечылаштыже мом ышташ лиеш, шотыш налза.
Яндар южышто жапым чӱчкыдынрак эртарыза. Иктаж оҥай книгам налын, садыш
але паркыш лектын шичса. Йолташ-влак дене пикникыш кайыза. Пӱртӱсыш лектын коштса, кас кечым ужатыза. Утларак чевер кече йымалне лийза, организмым D витамин дене пойдарыза. Вет тиде витамин иммунитетым пеҥгыдемдаш полша да организмыште серотониным, куан да нӧлталтше кумыл гормоным, шукемда.
У хоббим муза. Усталык шотышто эксперимент арням эртарыза. Пӧрткӧргым сӧрастараш кагаз дене иктаж-мом ямдылен ончыза, але чонлан келшыше вес сомылым муза. Тыге шыже кастене йокрокланен шинчаш огыда тӱҥал.
Режимым шотыш кондыза. Кастене ондакрак малаш вочса, эрденат шуко малаш ида тырше. Тыге тунемме ийлан шкендам ямдыледа.
Тунемме ийлан шкаланда цельым шындыза. Сай отметкым налаш, спорт дене кылым кучаш веле огыл, мутлан, иктаж оҥай книгам лудаш, у сомыллан тунемаш да молат.
Мӧҥгыштӧ паша ӱстелым у тунемме ийлан ямдылыза: оккӱлым кораҥдыза, кӱлешым радам дене шке верышкыже оптыза.
У вургемым ямдылыза. Кудо вургемым огыда чий, тудым шкаф гыч кораҥдыза. Кевытыште гын модылан келшыше чиемым гына огыл, икмыняр тургым чияш келшыше вургемым налаш тыршыза.
Ирина АЛЕКСАНДРОВА.