Тиде 12 ий ончыч 4 январьыште лийын. Тунам чылан, У ийлан куанен, пайремым ыштеныт, уналыкеш коштыныт. А мемнан ешышкына ойго омсам тӱкалтен пурен – авамын аваже колен. Тудо 67 ийым гына темен ыле.
Ковам ялыште шкет илен. Мый тунам 10 ияш гына улам ыле, садлан ача-авам ковам тояш наҥгаен огытыл. Тудо ийынак кеҥежым ковамын пӧртшым ужалаш кутырен келшеныт, налше вашке лектын. Тылеч ончыч суртышто кӱлеш ӱзгарым, арверым кондаш, оккӱлым кудалташ кӱлын. Садлан, каникулем тӱҥалмеке, икмыняр кечылан ялыш каенна.
Ковамым чот йӧратенам. Илымыж годым кажне кеҥеж каникулым ялыште эртаренам. Садлан пустаҥше пӧртыш миен пураш йӧсӧ ыле.
Кечывалым иктым ыштет, вес сомыллан пижат, йокрокланаш, шонкалаш ярсыме огыл. Кастене диваныште телевизорым ончен шинчымем годым пурла могырым ала-кӧн шогымыжым шижым. Но вуем савыралаш тоштын омыл, шӱлалташат лӱдын шинчем. Ачам ден авам тиде жапыште кухньышто лийыныт. Лӱдынак, вуем пурлашкыла савыральым. Окна воктенысе ӱстел пелен ковам шога, ош кофтычкан, ошалге-канде юбкан. Илымыж годымат тудо эре ты верыште шогылтеш ыле: пел кидше дене ӱстелыш эҥерта, кумыкрак лиеш да окна воктене кушшо туара пеледышыжым тӧрлата, кукшо лышташым кораҥда.
Ик жаплан шинчам кумышым, кухньышкыла вуем савырен, авамым кычкыралнем ыле. Ала шинчамлан коеш манын шонен, окна могырыш уэш ончальым, но тушто иктат лийын огыл. Тунам мый нимынярат лӱдын омыл. Паленам, ковам мыйым йӧрата да лӱдыкташ ок тӱҥал.
Тылеч вара ятыр ий эртен, но авамлан тидын нерген шукерте огыл гына каласкаленам. «Коватым тыгаяк вургем дене тоенна, – мане да ешарыш. – Тойымо кечын омым ужынам. Авам мый декем толын да ойла: «Уныкам дене чеверласен шуктен омыл».
Ала тунам ковам чынжымак мый денем чеверласаш толын? Вет тыге лийме деч вара ме тудын суртышкыжо миен огынал. Кызыт тушто вес еш ила.
Алёна.
Волжск.
Интернет гыч налме фото.