«Кугарня» газетын черетан номерже адакат оҥай материал-влаклан поян.
«Шулдыран пагыт» лаштыкна ПГТУ-ш, икымше курсыш, тунемаш толшо марий ӱдырын, Анастасия Элембаеван, шонымашлажым почын пуа. Тыгак республикысе школ лесничесте-влакын слётышт да моло увер денат палдара.
«Шинчымаш кугорнышто» лаштык марий учбник-влак нерген мутланымашым темла. Тидын нерген Марий туныктыш институтын редакционно-издательский пӧлкажым вуйлатыше Надежда Гусева каласкала.
Ик лаштыкыште Оршанке район Марий Руя ял дене палдаренна гын, весыште Морко вел Купсолаште илыше да газетлашке возен шогышо йолташна Лев Александрович Сошин нергенат материалым савыктенна.
«Сылнылык тӱня» лаштык путешествийыш кошташ кумылаҥше марий ӱдыр нерген каласкала. Светлана Васильева Германийыш кок тӱрлӧ программе почеш миен толын, эн ончыч тунемын, варажым пашам ыштен ончен. Шукерте огыл Кавказыште лийын. А шкеже Медведевыште ик пекарне вуйлатышылан пашам ышта. Теве тыгай оҥай героине дене вашлийын мемнан корреспондентна Вероника Мустаева.
Вес корреспондентна Елена Годунова Йошкар-Олан моторлыкшылан вуйын шогышо еҥ, Йошкар-Ола администраций вуйлатышын алмаштышыже Сергей Васильев дене мутланен. Кӧ рӱдолашкына толын ончалын огыл гын, могай у объект улмым пален налын кертыда.