Марий Элыште прививкым ыштат. Кызыт кундемыштына илыше-влак кокла гыч 20 наре процентше (142 280 еҥ) грипп деч вакцинацийым эртен. 2025 ийыште эпидтургым мучаш марте ты чотым 60 процент марте кугемдаш палемдыме.
«Грипп деч профилактике йӧн кокла гыч вакцинаций ик эн сайлан шотлалтеш. Тыге чер ваштареш пеҥгыдын шогышо еҥ-влак шукемыт», – палдарат Роспотребнадзорын Марий Элысе управленийыштыже.
«Марий Элысе эпидемиологический ситуацийым республикысе Правительстве ден Роспотребнадзорын регионысо управленийже поснак чот тергат. Калыклан диспансеризацийым, тыгак профилактике мероприятий-влакым эртарымылан кугу тӱткыш ойыралтеш. Шыжым пӱсӧ респираторный вирусан инфекций пижын кертме лӱдыкшӧ кугемеш, грипп дене шукын черланат, садлан прививкым ыштыкташ шукертак тӱҥалыныт. Умбакыжат черым ончылтен пашам ышташ задачым шындена, тыге эн тӱҥым – еҥ-влакын илышыштым, тазалыкыштым – арален кодена», – ойлен Ю.Зайцев.
Санитарно-эпидемиологический сынан чрезвычайный ситуацийлан писын реагироватлыме команде-влакын пырля эртарыме III тӱнямбал ученийым почмаште Роспотребнадзор вуйлатыше А.Поповат прививкын кӱлешлыкше нерген каласен:
– Санитарно-эпидемиологический ситуацийым шотышто кучымаш Российысе элгӧргӧ да внешний политикын пашаштыже ик эн тӱҥлан шотлалтеш. Инфекций шарлымым чарыман, поснак – санитарно-эпидемиологий шотышто чрезвычайный ситуаций марте шуктен кертше чер-влакым.
РФ Президентын Юл кундемысе федеральный округысо полномочный представительже И.Комаровын палемдымыж почеш, тыгай сынан мероприятий-влак Юл кундем федеральный округышто кӱлыт. Санкций-влакым пуртымо жапыштат Юл кундемысе регионлаште тӱнямбал кӱкшытан мероприятий-шамыч эртаралтыт. Садлан пошкудо элласе эпидситуацийым терген шогыман, а санитарно-эпидемиологический службо-влак ямде лийшаш улыт.
«Санитарный щит страны – безопасность для здоровья» федеральный проектлан келшышын, Российыште патоген-влакым эскерыме кызытсе жаплан келыштарыме сетьым ыштыме – 113 лабораторийым да 153 ПЦР рӱдерым, 71 мобильный лабораторийым (тушеч 16 лабораторийже – Юл кундем ФО-што). Тений тыгай учений-влак чотышт денат, географий денат эн кугулан шотлалтыт. Тушко СНГ-ш пурышо 26 эл, тыгак Африкысе, Азийысе, Европысо да Кечывалвел Америкысе санитарно-эпидемиологический службын, медорганизаций ден шанче да туныктымо тӧнеж-влакын 150 специалистышт ушненыт.
https://www.freepik.com/ сайт гыч налме фото.