Мемнан кундемыште шочын-кушшо Олимпийский чемпион-влак улыт. Нунын нергенат шарнаш кӱлеш.
1968 ий 12 октябрьыште Кеҥежымсе олимпийский модмаште Мехикошто Марий Эл гыч спортсменке икымше гына выступатлен. Тиде самырык гимнастке Зинаида Воронина (Дружинина) лийын. Тудо тунам ныл медальым сеҥен налын, тышеч иктыже командный первенствыште шӧртньӧ медаль лийын. Чемпионко нерген республикын 100 ий теммыж лӱмеш «Марий Эл» ГТРК фильмым ямдылен. Тусо ик новеллыште Зинаида нерген ойлалтеш.
Зинаида 1947 ий 10 декабрьыште Йошкар-Олаште шочын. Оласе 1-ше №-ан школышто тунемын. Дружининан талантшым тренер Антонина Левшевич ужын шуктен. Варажым спортсменке Москосо «Динамо» спортклубын тренерже-влаклан келшен. Тыге 1965 ийыште З.Дружинина элнан рӱдолашкыже илаш куснен да тӱрлӧ соревнованийыште таҥасен.
1969 ийыште спортсменкын гимнаст Михаил Воронин дене эргышт шочын. Но кок ий гыч еш шаланен, спортсменке кочывӱд дене таҥлалтын. Кок ияш йоча ачаж дене илаш кодын. 1986-1992 ийлаште Зинаида Борисовна Балашиха литейномеханический заводышто пашам ыштен. 2001 ий 17 мартыште колен.
Тамара Даунене (Калягина) 1976 ийыште Олимпийский модмашын чемпионкыжо лийын. Баскетболистке 1951 ий 22 сентябрьыште Йошкар-Олаште шочын. 1968-1974 ийлаште Ленинград оласе «Спартак», 1974-1976 ийлаште Рига оласе (Латвий) «ТТТ», 1976-1981 ийлаште Моско оласе «Динамо» ӱдырамаш баскетбол командылаште модын. СССР-ын сулло спорт мастерже (1976), Тӱнямбал чемпионко (1971), Европын чемпионкыжо (1974, 1976), СССРын Чемпионкыжо (1974-1976). 1981 ийыште спортивный карьержым мучашлен
Ече дене тӱнямбал классан спорт мастер Киров областьын шочшыжо ечызе Нина Рочевамат (Селюнинам) марий спортсменкылан шотленыт. Тудо республикыштына Л.Глушковын вуйлатымыж почеш тренироватлалтын. Н.Рочева – 1980 ийысе Олимпийский модмашын ший призёржо, тӱнян чемионкыжо (1974), СССРын кум гана чемпионкыжо.
Тыгак СССР-ын иймаш дене сборныйыштыжо Светлана Исакова лийын. Тудо 1988 ийыште Сеулышто 100 метрыш иймаште визымше толын.
1992 ийыште Барселоно гыч пӧръеҥ волейбол турнир гыч СНГ-н объединенный команде 7-ше вер дене пӧртылын. Ты командыште Йошкар-Ола гыч воллейболист Олег Шатунов лийын.