Марий Эл Республикысе олимпийский резерв училищыште кундемнам да элнам тӱрлӧ таҥасымаште чапландарыше тале спортсмен-влакым ямдылат. Тыште тыгак физический культур да спорт областьыште кыдалаш профессионал шинчымашым пуат.
Училищыште Олимпийский модмашын кандаш тӱрлӧ видыштыже: дзюдо, куштылго атлетике, ече, спорт кучедалмаш, спортивный гимнастике, футбол, иймаш, регби – ӱдыр-рвезе-влак профессионально ямдылалтыт. Тыгак самбыште шуаралтыт. Тыште чемпион-влакым ямдылаш чыла шотыштат йӧн уло: кугу да йоҥгыдо спортзал, физкультурно-оздоровительный комплекс, ял ден селала гыч спортсмен-шамычлан илаш тӱшкагудо. Спортсмен-влак элнан тӱрлӧ олашке сборышко лектыт.
Тачысе кечылан училищыште 70 спортсмен шке профессионал мастарлыкшым шуара. Нунын кокла гыч 17 спортсмен – Российын спорт мастерже, 35 спортсмен – Российын спорт мастерыш кандидат, 8 тунемше 1-ше спортивный разрядым шуктен. Россий сборный команде-влакыш 8 спортсменым пуртымо. Марий Эл Республикысе сборный командылаште – 41 спортсмен.
Андрей Мошкин – куштылго атлетике дене спорт мастерыш кандидат. 2023 ийыште Российын первенствыштыже 3000 метрыш тӱрлӧ чаракым сеҥен куржмаште икымше лийын. Тыгак курык коклаште куржталмаш дене Российын первенствыштыже кумшо толын. Тений спортсменым куштылго атлетике дене юниор-влакын Российысе сборный командышкыже пуртеныт. Рвезе Йошкар-Олаште шочын-кушкын.
Ольга Прядкина – куштылго атлетике дене спорт мастерыш кандидат. 2023 ийыште Российын кубокшо верч таҥасымаште сеҥышыш лектын. Тыгак кросс дене элнан чемпионатыштыже кумшо лийын. Спортсменке куштылго атлетике дене Российын сборный командыштыже. Ӱдыр шочынжо Моско область гыч, но шке мастарлыкшым профессионально шуараш, Марий Элысе тунемме тӧнежым ойырен да тунемаш пурен.
Фёдор Телицын – иймаш дене Российын спорт мастерже. 2023 ийыште спортын ты видше дене Российын юношеский сборный командышкыже пурен. Спортсмен Юл кундем федеральный округын первенствыштыже, Российысе «Поволжье» лигыште икымше лийын. Российысе первенствын участникше, Йошкар-Ола гыч.
Степан Леухин регби дене икымше спортивный разрядым шуктен. Тений регби дене юниор-влакын Российысе сборный командышкыже пуртеныт. Медведево посёлкын шочшыжо.
Роман Кошпаев – греко-римский кучедалмаш дене спорт мастерыш кандидат. Спортын ты видыштыже 2021 ий годсек Российысе сборный командын еҥже. 2023 ийыште Юл кундем федеральный округын первенствыштыже кумшо лийын. 2023 ийыште Российын первенствыжын да чемпионатшын участникше. Йошкар-Олаште шочын-кушкын.
Тений училищын куд спортсменжылан «Российын спорт мастерже» лӱмым пуымо: иймаш спортышто Никита Лыжинлан, самбо дене Игорь Баданинлан, Дмитрий Комельчиклан, спортивный кучедалмаште Михаил Шахановлан, Рустам Умаровлан, спортивный гимнастикыште Анастасия Макаровалан.