7 июньышто Марий сылнымутын классикше С.Г.Чавайн дене палдарыше увер стендым Морко район Коркатово ял воктеч эртыше кугорнысо остановкышто почыныт.
Тушто лӱмлӧ писательнан портретшым сӱретлыме, «Ото» почеламутшо возалтын.
Шке кундемым йӧраташ да мокташ, тудын дене утларак кугешнаш таратыше тыгай стендым марий чолга ӱдырамаш Антонида Поликарповна Ильина ышташ темлен. Верысе администрацийым, Тӱвыра, печать да калык-влакын пашашт шотышто министерствын пашаеҥже-влакым тарватен. Пашам мучаш марте шукташ Марий калык конгресс полшен.
— Тыгай сӧрастарыме верым Татарстаныште ужынам ыле, кумылым тарватен. Мемнан денат ышташ кӱлеш манын мутланышна, тек молат ужын, шкенышт дене тыгайым ыштат, — манеш А.Ильина.
Тыге шонымо пашалан тӱшкан пижын, тыглай остановкым мотор верыш савырыме.
Пайрем шӱлышан тачысе погынымашым сӧрастараш верысе тӱвыра пӧртын пашаеҥже-влак, мурызо Валерий Петров полшеныт. Тушко чумыргышо-влаклан Марий книга савыктыш пӧрт деч «Ото» почеламут сборникым кучыктеныт.
