Йошкар-Оласе технологический колледжын студентше-влак Озаҥ олаште самырык дизайнер-влаклан эртарыме «Осенний стиль» конкурсышто 1-ше верым налыныт.
Тудым Российысе дизайнер-влак ушемын Татарстан Республикысе пӧлкаже, элысе палыме ургымо предприятий-влак эртареныт. Российын тӱрлӧ верже гыч 30 утла коллекцийым аклаш лукмо.
Марий Эл гыч студент-влак «StreetStyle» номинацийыште «Метаморфоз» вургем коллекцийым ончыктеныт. Капсульный коллекцийым спорт-шик стиль дене ыштыме. Кажне модель шуко лончан. Нуно икмыняр изделий гыч шогат. Кажныжым тӱрлӧ семын ушаш лиеш.
Участник-влакын мутышт почеш, конкурс мастарлыкым почын пуаш, профессийым чын ойырен налмым умылаш полша, тӱҥжӧ – шке вийлан ӱшанаш туныкта.
