Чапле тӱвыра пӧртлан вуйлатыше кӱлеш!

 

У Торъял район Чӱксола тӱвыра пӧртыштӧ тений февраль годсек вуйлатыше уке. Кызытеш тушко районысо тӧнежла гыч пашаеҥ-влак тӱрлӧ мероприятийым эртараш лектын коштыт.

«Ты ялыште илыше-влак У ий пайрем деч посна кодыт мо?» – йодым У Торъял районысо рӱдӧ клуб системым вуйлатыше С.И.Соколова деч.

«Чӱксола ялыште илыше-влакым мемнан рӱдерын тыгак калыкым социально аралыме пӧлкажын пашаеҥже-влак, «Единый Россий» партийын районысо пӧлкан еҥже-шамыч саламленыт. Нуно илалше да йоча-шамыч деке, тыгак мобилизоватлыме еҥын ешлашкышт миеныт да пӧлекым кучыктеныт. Ятырынже тыгай куанле пашам Йӱштӧ Кочай ден Лумӱдыр костюмым чиен шуктеныт. Тӱвыра пӧрт вуйлатышым кычалме жапыште мемнан клуб системысе пашаеҥ-влак калыкым куандарат. Январьыште каныш кечылаште ме тушко автоклуб дене миена, кинофильм-влакымат ончыкташ шонена, вет тӱвыра пӧртнам уэмдыме», – вашештыш Светлана Ивановна.

Тыште да воктенысе яллаште илыше-влак ынде уэмдыме тӱвыра пӧртыштӧ шке мастарлыкыштым шуарен кертыт. Тудым торжественно 22 декабрьыште почмо. Ты пашалан 23,9 миллион теҥге ойыралтын. Канализаций, вӱд ден тулым пуышо системе-влакым вашталтыме, пожар сигнализацийым ыштыме. Пӧлемлам, фойем, куштымо да ончымо зал-влакым ачалыме. Тыгак сценынат «вургемже» вашталтын. Леведышым тӧрлымӧ, зданий ончылат уэмын.

Пайрем кечын уна-влакым Чӱксола тӱвыра пӧртын «Ош куэ» ансамбльжын участникше-влак кинде-шинчал дене вашлийыныт. А варажым чапле концерт лийын. Фойеште кидмастар-влакын пашаштым ончаш йӧным ыштыме.

Тӱвыра пӧрт ончычсо семынак калыкым чумырышо вер лиеш да верысе калыклан ятыр куаным конда манаш ӱшан уло.

СНИМКЫШТЕ: У Торъял районысо рӱдӧ клуб системын пашаеҥже-влак Тушнур фермыш миен коштыныт да вольыкым ончышо-влакым У ий дене саламленыт.