Параньга районысо чыла клубышто Украиныште специальный военный операцийыште улшо-влак лӱмеш благотворительный концертым ончыктеныт, тыгак оксам погеныт. Тыгай пашаш Олор ялысе калык рӱж ушнен. Тушто концертым 16 апрельыште лийын.
Фотошто — А.Никитин.
Тӱҥалтыште Усола сельсовет администрацийым вуйлатыше Александр Никитинлан шомакым пуымо, кызытсе куштылго огыл жап нерген тудо каласкален. Вет Олор гыч икмыняр рвезе спецоперацийыште кредалеш. Нунын верч ача-авашт, родо-тукымышт, уло ял калык тургыжланат да сайлан гына ӱшанат.
Концертыште Олор ялысе тӱвыра пӧртын «Кас ӱжара» ансамбльже, тунемше-влак выступатленыт, тыгак икмыняр номерым Элпанур клуб гыч ончыктымо.
Тыгай поро пашам кузе шуктен толмо нерген Олор тӱвыра пӧртын вуйлатышыже Надежда Бирюкова дене мутланышна:
– Тыгай благотворительный оксам ял калык деч ме эрак погаш тӱҥалынна. Тидын шотышто Олор ялыште илыше еҥ-влак поро пашам шукташ эре чолга улыт. Чылан манме гай 500, 1000 теҥге дене пуэныт. Районышто ме оксам эн шуко, 73 тӱжемат 800 теҥгем, поген сеҥенна. Тудым лишыл кечылаште Украиныш колтышаш улыт.
Концертыш чылаже 20 номерым пуртенна. Тудо шагатат 20 минут шуйнен.
9 апрельыште Кугу Пумарий тӱвыра пӧртыштӧ тыгаяк концертым шындыме. Тудым туныктышо, тунемше, клуб пашаеҥ-влак сӧрастареныт.
Тидын шотышто Кугу Пумарий тӱвыра пӧртын вуйлатышыже Валентина Мосунова тыгерак мане:
– Мобилизаций жапыште Кугу Пумарий гыч 12 рвезе Украиныш каен. Спецоперацийыште улшо-влаклан посна акций почеш оксам, гуманитарный полышым погенна. Ял калык дене пырля 23 тӱжемат 150 теҥгем погымо.
Тенийысе жапыште концертыш еҥ-влакым ӱжаш нелырак. Сандене ме билет-влакым ончылгоч ужаленна. Калык залыште шуко ыле. Чылаже 25 номерым ончыктенна. Параньга тӱвыра пӧртын пашаеҥышт-влак индеш номерым конденыт. Йоча-влак «Чоткар патыр» спектакльын ужашыжым модын ончыктеныт. Концерт шукылан келшен, совым чот кыреныт.
Кызыт неле жапыште ялысе калык кертме семын полыш кидым шуялта. Рвезе-влакын таза пӧртылмыштым вучен ила. Тӱҥжӧ – ты йӧсӧ пагыт эрта, тӱняште тыныс лиеш манын моткоч ӱшана.